Derbi padiksutim është ndeshja më e rëndësishme në Superiore, e cila merr vëmendjen e të gjithë sportdashësve. Emocionet e përballjes Dinamo – Partizani prej ditësh kanë “kapluar” tifozët dhe vetë ekipet, ndërsa pritet që në “Elbasan Arena” në orën 17:00 të luhen një takim mjaft i luftuar.
Por nuk do të jetë një derbi dosido, pasi në këtë takim do të jetë një sfidë brenda sfidës. Në fakt këtë ndeshje mund ta quajmë derbi i të pamposhturve në Superiore. Këtu nuk e kam fjalën për ekipet, por për trajnerët e tyre.
Ilir Daja dhe Aleksandar Veselinovic janë trajnerët e pamposhtur ende në Superiore. Që kur kanë nisur aventurën e tyre në këtë sezon ende nuk e dinë se si është shija e humbjes. Ilir Daja ka debutuar në stolin e Dinamos pikërisht në derbi kundër Partizanin, takim që u mbyll në barazim dhe prej 9 ndeshjesh merr rezultate pozitive.
Ndërkohë Veselinovic u ul në stolin e Partizanit në duelin me Teutën, takim që u mbyll 2-0 për kryeqytetasit. Në 10 ndeshje e radhës ka arritur të korrë vetëm rezultate pozitive dhe në “Elbasan Arena” pasditen e sotme do të sfidohen “kokë më kokë” Daja dhe Veselinovic për fitoren.
Lexo gjithashtu
