Vëmendja në Lozanë, sa shanse kanë kampionët për fitore…

Sot zhvillohet seanca gjyqësore e Skënderbeut në Gjykatën e Arbitrazhit Sportiv dhe gjithë korçarët e kanë mendjen te vendimi që do të japë kjo gjykatë. Mundësitë janë që të kemi që sot një vendim të KAS-it, por e shumta pritja mund të zgjasë deri të mërkurën, më 6 korrik. Po sa shanse kanë kampionët për të dalë të larë nga kjo histori? Shanset janë të mëdha, pasi KAS-i kërkon prova konkrete në dhënien e një dënimi dhe UEFA nuk ka publikuar asnjë të tillë për Skënderbeun në gjithë këtë histori. Madje, ka pasur mungesë të theksuar transparance në këtë drejtim dhe gjithçka është mësuar, është publikuar nga klubi korçar. Një tjetër fakt, që i shton shanset e Skënderbeut për vendim pozitiv është se ky ekip është shortuar në Champions. Po ashtu, është për t’u vlerësuar fakti që klubi kampion i Shqipërisë mbrohet sot nga avokatë shumë të fortë.

MINUSET – Ajo që mund të penalizojë ekipin korçar është se ai është nën hetim prej 6 vitesh dhe mund ta ketë “mbushur kupën”. Ndërkohë, nga UEFA është thënë se disponon fakte të pakundërshtueshme për përfshirjen e korçarëve në trukim ndeshjesh dhe zakonisht ky institucion nuk bën gabime në dosje të kësaj natyre. Mund të kujtojmë ndërkohë edhe precedentin e Metalistit sezonin e shkuar, që u dënua dhe PAOK-u i Kaçes kaloi direkt në turin tjetër.