Sot Partizani zhvilloi një miqësore kundër skuadrës Berliner AK 07, ndeshje që përfundoi me rezultatin 2-2. Në minutën e 50-të të këtij takimi, trajneri Starova zëvendësoi mesfushorin Lorenc Trashi dhe në këtë moment nisi një debat i ashpër mes tyre.
Për këtë, newsport.al kontaktoi vetë futbollistin, i cili fillimisht nuk pranoi të fliste për këtë situatë të tensionuar. Pas këmbënguljes sonë, ai tregoi çfarë kishte ndodhur.
"Është e vërtetë që ka pasur një debat mes meje dhe trajnerit Sulejman Starova. Nuk dua të zgjatem, por mund t'iu them që unë nuk jam në planet e tij. Ai ma komunikoi vetë dhe më tha: "Nuk të dua në ekip".
Ndoshta nuk i përshtatem lojës dhe skemave të tij, por mendoj se ka të tjerë që i vlerësojnë me qetësi cilësitë e mia. Tashmë gjithçka është mbyllur dhe në Shqipëri sapo të vij do ta diskutoj me presidentin Gaz Demi për të sqaruar të ardhmen time", ka deklaruar për newsport.al Lorenc Trashi.
Lexo gjithashtu
