Interi mposhti në “San Siro” Milanin në gjysmëfinalen e parë mes tyre në Champions League. Një fitore që gëzon trajnerin Simone Inzaghi, pasi tashmë skuadra e tij ka hedhur një hap drejt finales së Stambollit.
Pas këtij triumfi timonieri zikaltër do të theksonte se djemtë e tij bënë një lojë shumë të mirë dhe janë afër arritjes së objektivit që mungon prej 13 vitesh.
“Kemi pasur një pjesë të parë të jashtëzakonshme, jam shumë i kënaqur. Natyrisht që mund të kishim shënuar edhe më shumë se dy gola, por ishte një ndeshje e shkëlqyer. Ne e dimë se jemi përpara. Por tani është ndeshja e dytë, do të luajmë në shtëpi dhe do të kemi tifozët tanë dhe do të bëjmë një përpjekje për një ëndërr të madhe.
Djemtë mbuluan çdo centimetër, ata që hynë dhanë përgjigje të shkëlqyera, kështu realizohen paraqitje të shkëlqyera. Për 72 orë kemi një ndeshje shumë të rëndësishme kundër Sassuolos dhe do të duhet të jemi të mirë në rikuperimin fizik dhe psikologjik pasi kemi shpenzuar shumë.
Mkhitaryan dhe Dzeko? Ata patën një lojë të mrekullueshme, ata janë të shkëlqyer ashtu si të gjithë të tjerët, bashkë me ata në pankinë që dëshironin të hynin. Një trajner duhet të bëjë shumë për vendimet. Çdo ndeshje ka nga ata që presin të luajnë dhe ndoshta nuk janë të lumtur që nuk aktivizohen, por për mua e rëndësishme është që të gjithë kanë një zemër dhe një dëshirë të madhe për të bërë mirë për këtë fanellë”, ka deklaruar Inzaghi.
Lexo gjithashtu
