Ndeshja që bëri historinë për futbollin e femrave në Shqipëri, ajo mes Vllaznisë dhe Vorskla Poltava e mbyllur me shifrat 2-1 është ndjekur live në shkallët e “Loro Boriçit” nga ambasadori Ukrainës Volodymyr Shukrov. Ambasadori u prononcua për mediat menjëherë pas takimit.
Dhe pse do të dëshironte një fitore të vajzave ukrainase, ambasadori nuk i kurseu lëvdata për vajzat shkodrane. Një takim që solli tepër emocione për të dyja kampet respektive u kurorëzua me arritjen historike të Vllaznisë së femrave që do të jetë pjesë e fazës së grupeve në UEFA Women’s Champions League.
Deklarata e Volodymyr Shukrov për mediat:
“Të dy skuadrat kanë luajtur në mënyrë të shkëlqyer, ishin disa momente shumë pikante. Sigurisht unë do të doja që skuadra e Ukrainës të fitonte ose të kishte barazim por fitoi skuadra shqiptare e cila ka luajtur shumë mirë. Uroj Vllazninë dhe shpresoj shumë që do të kemi sërish ndeshje të bukura. Flamuri ndikon padiskutim në lojën dhe sidomos tani lufta ndikon emocionalisht te vajzat. Por skuadra e Shqipërisë ka qenë një skuadër e mirë dhe vajzat e kanë merituar fitoren. Ndeshja ishte shumë e bukur. Shpresojmë që së shpejti lufta në Ukrainë do përfundojë dhe gjithë padrejtësitë që po ndodhin ndaj popullsisë civile do marrin fund”.
