Presidenti Ardjan Takaj dhe ndihmësit e tij te Skënderbeu janë duke e ndërtuar ekipin me shpejtësi. Mund të themi që po e rindërtojnë skuadrën, pasi largimet janë të shumta nga mbrojtja e deri në sulm. Korçarët do të luajnë në raundin e dytë të Champions League kundër Ferencvarosh, kështu që i duhet që të bëjnë skuadër të fortë që të përballojë këtë kundërshtar.
Synimi i korçarëve këtë vit është që të shkojnë në grupet e Champions-it, por pa ëndërruar shumë, ata kanë nisur që të bëjnë ekipin e sezonit të ardhshëm, mund të themi superskuadër. Kanë afruar lojtarë me potencial, ku mes tyre mund të përmendim Hektor Idrizajn për krahun e djathtë të mbrojtjes dhe mesfushës dhe Masato Fukuin për sulmin, ndërsa “goditjet” në merkato nuk janë ndalur me kaq ditën e sotme në rezidencën e kampionave në fuqi të Shqipërisë. Sot, pas marrëveshjes me Fukuin, korçarët kanë arritur akordin me tre lojtarë të tjerë, bëhet fjalë për një mbrojtës, një mesfushor dhe një sulmues me potencial.
Arbnor Fejzullahu, Jurgen Gjasula, Mathew Boniface janë tre akordet e fundit nga kampi bardhekuq. Sipas burimeve të “newsport.al”, të tre lojtarët kanë gjetur akordin me skuadrën e presidentit Ardjan Takaj. Fejzullahu nuk udhëtoi me Partizanin në Itali, pasi kontrata e tij përfundoi me të kuqtë, ndërsa Gjasula prej disa ditësh është parë në Tiranë. Ky i fundit ka luajtur për Greuther Furth sezonin e fundit në Gjermani, ndërsa ka veshur dhe fanellën kuqezi në disa ndeshje. Sa i përket sulmuesit Mathew Boniface, në sezonin e fundit është aktivizuar me Aris Limassol në kampionatin qipriot, ku në 28 ndeshje ka shënuar 8 gola. Nigeriani është 22 vjeç dhe premtues për të ardhmen.
https://www.youtube.com/watch?v=NSseE58d1B8
