Ky sezon do të mbahet mënd gjatë si sezoni i një rekordi negativ. Numri i pakët i tifozëve në shkallët e stadiumit është padyshim një shifër që përbën një lajm më vetë. Aspak pozitive por e vërtetë. Edhe pse kampionati prodhon emocione dhe garë javë pas jave, oraret janë favorizuese, stadiumet janë përmirësuar me kushtet që ofrojnë dhe skuadrat kanë rritur nivelin e lojës, sërish numri i tifozëve ka pësuar rënie drastike.
Partizani dhe Tirana janë dy klubet që kanë kontribuar pa dashje për këtë rekord. Fillimisht të kuqtë në gjysmën e parë të sezonit luajtën jashtë kryeqytetit duke i pamundësuar tifozëve udhëtimin masiv. Pas tyre, Tirana u fut në një krizë rezultatesh dhe tifozët bojkotuan masivisht pjesëmarrjen në stadium për shkak të akordit që klubi bëri me Partizanin për stadiumin “Selman Stermasi”.
Në Shkodër tifozët e kanë braktisur zyrtarisht skuadrën edhe pse këtë vit duhet të gëzonin një stadium të ri si “Loro Boriçi”. Në Peshkopi nuk u luajt kurrë përgjatë sezonit dhe Korabi u detyrua të provonte pse “shtëpi” me qera. Luftëtari bëri fushën dhe rregulloi stadiumin për të mos e nisur nga fillimi sezonin e për pasojë dhe tifozët e kishin të pamundur të udhëtonin në takimet e para.
Në Durrës duhet të vij ndonjëra nga kryesueset që tifozët të shfaqen edhe pse jo në numër të madh. Në Laç duan vetëm “finale” për të mbushur shkallët e stadiumit, ndërsa në Kukës e duan me çdo kusht hyrjen falas. Në Vlorë kriza e rezultateve nuk i motivon tifozët ndërsa në Korçë, çuditshëm por edhe pse ekipi prodhon rezultat tifozët nuk vijnë njësoj si në vitet e para të sukseve.
Loading ...
