Ditën e sotme në “Elbasan Arena” Tirana do të presë Teutën për të zhvilluar mes tyre gjysmëfinalen e parë mes tyre, teksa në orën 18:00 skuadrat do të zbresin në fushën e blertë.
Të dyja ekipet kërkojnë që të shkojnë deri në fund këtij trofeu, me bardheblutë që duan të bëjnë edhe tripletën, ndërkohë djemtë e detit synim kanë Europën. Fitorja e Kupës do iu jepte mundësinë të arrinin në Conference League.
Në 13 përballjet e fundit mes tyre në kampionat, Kupë dhe Superkupën e Shqipërisë, kampionët kanë dalë fitimtarë në 6 raste, 2 sfida kanë përfunduar në barazim dhe 5 takime kanë shkuar në favorin e durrsakëve.
Kryeqytetasit u kanë shënuar durrsakëve 18 gola, ndërsa kanë pësuar 12 gola. Interesant është fakti që skuadra e Edi Martinit ka arritur të triumfojë në finalen e Kupës së Shqipërisë ndaj Tiranës me shifrat 2-0, takim i luajtur më 02.08.2020. Gjithashtu Teuta fitoi edhe një tjetër trofe para syve të kampionëve në Superkupën e Shqipërisë më 31.08.2020. Në atë takim djemtë e detit fituan 2-1 dhe në stolin e tyre ishte trajneri Edi Martini. Ky i fundit ka fituar dy trofe para syve të kampionëve aktualë të Orges Shehit.
Tirana është skuadra që ka fituar më shumë Kupën e Shqipërisë, plot 16 herë, ndërsa Teuta e ka fituar 4 herë trofeun gjatë historisë së saj.
