Dita e dielë është padyshim dita ku të gjithë kërkojnë relaksin dhe pushimin, e sidomos në këtë periudhë vere kaq të nxehtë. Por kjo e dielë, nuk do ketë “pushim” për ata që janë të dashuruar me futbollin.
Luhen dy klasike të futbollit botëror. Luhen dy finale historike. Luhet nga “Maracana” e Rios deri në “Wembley” të Londres. Në kontinentin e kafes, sambas, karnavaleve, tangos dhe njerëzve revolucionarë do luhet finalja mes Brazilit dhe Argjentinës për Copa America. Ndërsa në kontinentin e Vjetër, në kontinentin e kinematografisë, futbollit, Bashkimit Europian luhet finalja e Euro 2020 mes Anglisë dhe Italisë. 4 shkolla futbolli, 4 tradita, 4 ekipe kombëtare që kanë gdhendur emrin e tyre me shkronja të arta në historinë e futbollit botëror. E patjetër nëse do doje skuadrën perfekte do kishe nevojë për nacionalizmin italian, forcën angleze, krenarinë argjentinase dhe klasin brazilian.
Klasikja e Amerikës së Jugut na vjen në orët e para të ditës së dielës dhe mund të shijohet ndoshta deri në të zbardhur të mëngjesit. Një Messi që si rrallë herë po merr përdore fatet e kombëtares së tij përballë një Brazili që duket i pamposhtur me liderin e tyre Neymar Jr. Ndeshja që të gjithë duan ta shohin, finalja mes “Selecao” dhe “Seleçion”. Dhe dita e dielë kështu nis në mënyrën më të bukur.
Pastaj të gjithë mund të “pushojnë” për pak orë përpara se të nisen në plazh e për të vijuar mendimet për finalen e Europianit. Tjetër klasike europiane. Tjetër ndeshje e mbushur me pasuri dhe histori. Tjetër finale që luhet në një stadium mitik. Vëllezërit italianë (Fratelli d’Italia) përballë “djemëve” të Mbretëreshës. Dy kombëtaret që e merituan më shumë se askush për të qenë në këtë finale. Dy skuadra që premtojnë spektakël dhe një finale epike.
Pra e diela nuk do ketë “pushim”, por vetëm futboll, nga ai i nivelit më të lartë. Nga ai i yjeve të këtij sporti dhe i kombëtareve më të forta të historisë. E ndërsa presim për këto finale, në mend kalojnë momentet epike si ai gol i shumë diskutuar i Goeff Hurst (Anglia) në finalen e 1966 kundër Gjermanisë. Humbja e Brazilit madhështor të 1982 përballë Italisë së Rossit, “Dora e Zotit” e Maradonas në 1986 kundër Anglisë apo edhe humbja e penalltisë e Roby Baggios kundër Brazilit në finalen e 1994 në SHBA.
E këto kombe kanë prodhuar 12 Kupa Bote (5 Brazili, 4 Italia, 2 Argjentina, 1 Anglia) 1 Europian (1 Italia) dhe 23 Copa America (14 Argjentina, 9 Brazili). Kanë dhuruar 21 Topa të Artë ( 6 Argjentina, Leo Messi) (5 Brazili, 2x Ronaldo, Rivaldo, Ronaldinho, Kaka) (5 Italia, Fabio Cannavaro, Roberto Baggio, Paolo Rossi, Omar Sivori, Gianni Rivera) (5 Anglia, 2x Kevin Keegan, Booby Charlton, Michael Oëen, Stanley Mattheës). E ndërkohë më mirë relaksohuni të shtunën pasi të dielën do jeni të “zënë” vetëm me futboll. /Endri Çinari/
Loading ...
