Teuta pret sot në “Niko Dovana” Partizanin (17:00). Tre javë nga fundi I sezonit luhet ndeshja më e rëndësishme e kampionatit, me Djemtë e Detit që janë tri pikë para Partizanit të Dajës, duke kryesuar Superligën.
Në Durrës pritet një ndeshje e luftuar, me Teutën që ka më shumë arsye për të fituar në këtë sfidë. Me dy rezultate në “xhep” edhe për shkak të diferencës, djemtë e Martinit do kërkojnë të ndalin edhe njëherë këtë sezon të kuqtë. Në tre sfidat e mëparshme me tyre, ndeshjet kanë përfunduar dy herë 0-0 dhe një herë 1-1.
10 arsyet pse Teuta ndal sot Partizanin:
-Teuta do kërkojë të fitojë trofeun në Superligë pas 27 vjetësh, teksa hera e parë dhe e fundit ka ndodhur në sezonin 1993-94.
-Në stol është një trajner si Edi Martini, që ka provuar shijen e trofeut në kohën kur ka luajtur futboll dhe e cilëson sfidën e sotme si më të rëndësishmen në karrierë.
-Durrsakët kanë mbrojtjen më të mirë në këtë sezon mes 10 skuadrave të Superligës, duke pësuar vetëm 14 gola.
-Luajnë në shtëpinë e tyre dhe do duhet të shfrytëzojnë faktorin fushë.
-Teuta ka dy rezultate në lojë dhe do duhet të jetë më e qetë nga ana psikologjike, paçka se presioni gjithmonë është për skuadrën që qëndron më sipër në tabelë.
-Teuta në 16 ndeshjet e fundit ka pësuar vetëm një humbje, atë ndaj Tiranën në “Niko Dovana”, duke treguar formën e mirë të sezonit.
-Teuta është e motivuar financiarisht, me presidentin Hasanbelliu që ka premtuar premio të madhe në rast të triumfit.
-Në skuadër ka lojtarë mbrojtës si Hoxha dhe Arapi, që janë mjeshtra në prapavijë për të ndalur sulmet e Partizanit.
-Teuta ka në sulm një ekspert si Dejvi Bregu, ndoshta lojtarin më konstant të Superligës në vitet e fundit. Forma e tij e mirë padyshim do të thotë një Teutë më cilësore.
-Trofeu do thotë pjesëmarrje në Champions League, me klubin që do përfitojë të ardhura më shumë në kushtet kur pandemia ka ndikuar në futbollin shqiptar. Vitrina Europë do sillte edhe shitje të talenteve.
Loading ...
