Të enjten do të luhet derbi i shumëpritur mes Partizanit dhe Tiranës, ndeshje e vlefshme për javën e 15-të të Superiores. Një takim që veç rezultatit, luhet për prestigj. Të kuqtë vijnë në këtë sfidë pas fitores 2-1 kundër Skënderbeut në transfertë, ndërsa bardheblutë pas triumfit me përmbysje 2-1 ndaj Kastriotit në shtëpi.
Në një ndeshje derbi, nuk mund të ketë kurrë favoritë. Megjithatë newsport.al ka analizuar takimin dhe ka radhitur 10 arsye se pse Partizani mund të dalë me 3 pikë nga ndeshja e së enjtes që do të zhvillohet në orën 18:00, në “Elbasan Arena”.
10 ARSYET PSE PARTIZANI FITON KUNDËR TIRANËS
– Luajnë në një terren si “Elbasan Arena”, ku kanë treguar se dijnë ta përdorin dhe të manovrojnë mirë me topin.
– Ilir Daja nuk e ka fituar kurrë një derbi dhe një sfidë të tillë ai po e përgatit në mënyrën më të mirë të mundshme.
– Në skuadër janë afruar dy futbollistë cilësorë si Murataj dhe Junior e ndaj bardhebluve janë më të motivuar se kurrë.
– Presidenti Gaz Demi ka treguar gjithmonë se nuk kursehet dhe një premio do t’i motivonte dyfish të kuqtë.
– Grupi është ruajtur nga sezoni i kaluar dhe futbollistët e njohin mjaft mirë njëri-tjetrin.
– Ka në skuadër lojtarë që bëjnë diferencën dhe zgjidhin një derbi si Mala, Bardhi dhe Jasir Asani.
– Kanë një sulm të mirë me 21 gola dhe një mbrojtje që ka pësuar vetëm 9 të tillë.
– Një hap fals do t’i largonte më shumë me kryesuesen Vllazninë dhe çështja e titullit kampion komplikohet më tepër.
– Një ndeshje e radhës, por veç 3 pikëve, luhet për prestigj apo siç e thonë tifozët, për të “sunduar” kryeqytetin.
– Në sfida të veçanta, skuadra me në krye Ilir Dajën ka treguar se di të sillet pragmatiste duke marrë rezultatet e kërkuara. /Newsport.al/