Arsim Fehmiu, pedagog i njohur në Prishtinë dhe trajnues sportiv, ka ndërruar jetë këtë të enjte në moshën 90 vjeçare. Vetëm pak ditë më parë, profesor Fehmiu ka festuar plot 9 dekada jetë, 7 prej të cilave ia dedikoi sportit.
Pedagogu dhe trajnuesi sportiv, lindi më 3 qershor 1932 në Sarajevë, ku e nisi shkollimin për ta vazhduar më pas në Kosovë. Por, pa i mbushur 18 vjet mori përsipër drejtimin e Shkollës së mesme të Fizkulturës në Zemun të Serbisë.
Studimet në Institutin Shtetëror të Fizkulturës – DIF- dhe në Shkollën Federative të Trajnerëve – Degën e Futbollit i kreu në Beograd, ku dorëzoi edhe Disertacionin e Doktoratës në Fakultetin e Kulturës Fizike të Universitetit të Beogradit, pasi më parë kreu studimet pasuniversitare dhe u magjistra në Shkup.
Që nga viti 1947, kur nisi punës si mësimdhënës, e kur e vazhdoi dhe si trajner, Arsim Fehmiu nuk pushoi së ushtruari funksione drejtuese në sporte të ndryshme në Kosovë e gjithandej ish-Jugosllavisë.
Kështu u bë trajneri i parë shqiptar i Kosovës me licencë federative dhe ndërkombëtare, themelues i institucioneve sportive në Kosovë duke përfshirë edhe Lidhjen e Futbollit te Kosovës, që ishte paraardhëse e Federatës së Futbollit të Kosovës.
Kjo derisa e themeloi edhe Fakultetin e Kulturës Fizike në kuadër të të cilit edhe katedrën e Futbollit.
Për veprimtari si sportist, pedagog dhe punëtor sportiv është mbajtës i shumë shpërblimeve, pllaketave, mirënjohjeve dhe dekoratave. Një iu nda edhe pak ditë më parë ditëlindjen e 90-të, nga kreu i Federatës së Futbollit të Kosovës, Agim Ademi, si mirënjohje.
Lexo gjithashtu
