Xhuliano Skuka u bë lojtari më i shtrenjë i shitur ndonjëherë nga kampionati shqiptar. Plot 1.4 milionë euro janë derdhur në arkën e Partizanit nga francezët e Metz. Në një intervistë për Supersport, Skuka tregon momentet më kulminante të karrierës së tij dhe se si e pritën në Francë. Momenti më i keq për Skukën është zëvëndësimi në minutën e 43’ nga trajneri Bledi Shkëmbi në kohën kur ishte pjesë e Dinamos përballë Teutës.
“Janë të gjithë djem të rinj, përveç 3-4 lojtarëve me eksperiencë. Të gjithë janë djem të mirë, mosha ime dhe ndihem shumë mirë. Si ekip ka shumë cilësi, ka shumë teknikë, por ndoshta mungon pak agresiviteti. Gjëja e parë që më tha trajneri, është se kishte vlerësuar shumë agresivitetin te unë dhe priste që ta shpalosja në fushë, apo ta transmetoja edhe te shokët e skuadrës”, tha Skuka.
“Unë kam si objektiv të jap maksimumin dhe të bëj të njëjtën gjë si te Partizani. Shpresoj të më ecë mirë këtu, por pse jo edhe te Kombëtarja. Do të bëj gjithçka që të bëhem pjesë fikse e Kombëtares. Kam arritur diçka, por kam ende shumë punë për të bërë. Duhet të mbaj këtë nivel dhe pse jo, të rritem edhe më shumë”, shprehet sulmuesi.
“Momenti më i keq i karrierës time, ka qenë në ndeshjen mes Dinamos dhe Teutës, kur jam zëvendësuar në minutën e 43-të. Aty kam thënë që do të bëj maksimumin për t’u treguar të gjithëve që e kanë gabim. Fati është patjetër i rëndësishëm, por mbi të gjitha është vetbesimi. Duhet të besosh te vetja, te aftësitë dhe te puna”, u shpreh futbollisti.
“Po bej një hap shumë të madh për karrierën time, por u mërzita që nuk më lanë të rrija edhe një ndeshje të fundit me Partizanin. Doja të luaja edhe një ndeshje të fundit, të përshëndetesha me tifozët. Peng kam që nuk e lashë partizanin në vendin e parë. Partizani është ndërtuar për të fituar, ndaj besoj që çunat do t’ia dalin edhe pa mua”, mbyll rrëfimin e tij Skuka.
Lexo gjithashtu
