Sabien Lilaj zbulon diferencat mes Kukësit dhe Skënderbeut

Sabien Lilaj hyn në treshen e lojtarëve të Skënderbeut që janë huazuar te Kukësi për Europa League. Ai është bashkëngjitur shumë mirë grupit të lojtarëve të Kukësit, madje në pjesën e dytë të ndeshjes së parë me Austrinë e Vjenës ka arritur që të lexojë dhe të interperetojë mjaft mirë lojën.

I kontaktuar nga “Panorama Sport”, Lilaj tregon diferencat mes dy skuadrave, Kukësit dhe Skënderbeut. ME detaje ai shpjegon pse Skënderbeu qëndron më lartë se verilindorët, ndërsa simpatizon mënyrën e punës te Kukësi.

Ambientimi – Mendova se do e kisha të vështirë përshtatjen te Kukësi, por nuk ndodhi kështu. Të them të drejtën u ambientova mjaft, pasi duke filluar nga presidenti te trajneri dhe shokët e skuadrës na pritën mirë si mua ashtu dhe Latifin e Fukuin.

Diferencat – Ka mjaft gjëra që janë ndryshe mes Skënderbeut dhe Kukësit, duke nisur që nga fusha stërvitore. Kukësin nuk e ka një fushë të sajën, një ambient që lojtarët të qëndrojnë gjatë gjithë kohës. Stërviten në Tiranë dhe shkojnë në disa fusha stërvitore. Janë gjëra që shpërqendrojnë lojtarët, pa harruar dhe cilësinë e fushave ku stërviten.

Në pamje të parë këto duken gjëra të vogla, por që janë mjaft të rëndësishme. Diçka tjetër është se Skënderbeu ka pasur fatin të fitojë disa tituj rresht. Kukësi ka pasur vazhdimësi, por është ndryshe të fitosh kampionatin dhe ndryshe të dalësh i dyti, si nga ana ekonomike, si nga grupi e shumë të tjera. Kur fiton titullin të shtohet uria për më shumë.

Huazime shtesë – Nuk mund të them asnjë emër sepse i bie që të mos respektoj lojtarët aktualë të Kukësit. Por, mund të them se kundër Austrisë së Vjenës në pjesën e dytë luajtëm shumë mirë në grup edhe pse ishim lojtarë të sapoardhur në këtë ekip. Kukësi ka lojtarë me kualitet.