Tekniku i Tiranës Ze Maria doli dje në konferencën për shtyp për të folur rreth takimit të sotëm të orës 19:45 me Teutën. Braziliani foli takimin e javës së kaluar me Kamzën, nevojat e skuadrës, kundërshtarin e radhës Teuta si dhe ambicien për tituj këtë sezon.
“Teuta është një ekip shumë i mirë, pasi pashë ndeshjen e tyre me Flamurtarin dhe mund të them se kanë lojtarë shumë të fortë e të mirë. Do të përpiqemi të bëjmë më të mirën nesër dhe të shënojmë gola. Është shumë e rëndësishme, sidomos në fillim të sezonit, të shënosh gola dhe jo të pësosh, për këtë kemi punuar këto ditë. Ndeshja e parë na ka lënë disi gjurmë psikologjike, por duhet të mendojmë për javën që na pret, jo për atë që iku. Duhet të luajmë si Tirana e të fitojmë ndeshje. Luajtën shumë prej lojtarëve të sezonit të kaluar, sepse futbollistët e ardhur këtë verë, nuk janë ende gati për të zbatuar idetë e mia në fushë. Ata po përmirësohen nga dita në ditë dhe shumë shpejt do të startojnë si titullarë. Ndaj e kam theksuar gjithmonë se Tiranën e vërtetë do ta shihni vetëm pas javës së tretë. Në këtë grup mungon diçka. Më saktë një apo dy sulmues: një qendre dhe një krahu.Ua kam kërkuar drejtuesve dhe po punojmë për këtë.Ekipi do të jetë gati pas javës së tretë për të luftuar për 3 vendet e para. Qëllimi jonë është Europa, ndonëse Tirana duhet të fitoje trofe gjatë sezonit. Dëshira jonë është të jemi të parët, por në këtë moment nuk i kemi të gjithë lojtarët për të punuar për titullin. Nëse klubi më jep dy sulmuesit, Ngoo kthehet në fushë si dhe Lika do të jemi shumë të fortë e më afër titullin kampion”, deklaroi braziliani.
Loading ...
