Trajneri i Skënderbeut vlerëson situatën aktuale të kampionëve në fuqi të Shqipërisë, por nuk dorëzohet edhe pse skuadra e tij është dënuar me mospjesëmarrje në kompeticionet Europiane për një vit.
Korçarët u skualifikuan nga Champions League pas vendimit të CAS dhe vendin e tyre e mori Partizani. Kjo situatë nuk u prit aspak mirë nga bardhekuqtë, por tekniku nuk e komenton gjatë. Madje, shprehet se pas zhgënjimit, i ka ardhur forca dhe do që të garojë sa më fortë në këtë kampionat për të treguar vlerat e vërteta të skuadrës së tij.
CAS– U befasova pasi doli vendimi, por menjëherë reagova duke thënë se jam gati dhe mezi pres të fillojë gjithçka. Kam shumë uri për fitore. Prisja që CAS të na jepte të drejtën neve. Të them të drejtën më është dukur i ekzagjeruar vendimi. Por, nuk jam unë personi i duhur që të vendos.
Përgatitjet – Jam tepër i kënaqur. Djemtë kanë ndjekur plotësisht idetë e mia dhe ky është sinjal pozitiv. Ata e dinë mjaft mirë se pas këtij zhgënjimi duhet të nxjerrin në pah dhe të hedhin në fushë të gjithë motivimin për të bërë më të mirën.
Kualitetet – Nuk mund të bëj krahasime në ekip, për faktin se merkato nuk është mbyllur dhe nuk i kam parë ekipet në fushë.
Përforcimet – Disa gjëra i kemi diskutuar me presidentin dhe normalisht klubi di shumë mirë se për çfarë bëhet fjalë e ku duhet të ndërhyjë.
Matei – Ju krëkoj ndjesë, por për gjëra të tilla duhet që të flas vetëm me klubin.
Stërvitja – Do të rifillojmë më 31 korrik nga puna për sezonin e ri për të qenë sa më në formë për kampionatin. Nuk dimë se ku do të zhvillohet faza përgatitore, por shumë shpejt do ta vendosim.
Huazimet – Më është dukur diçka pozitive dhe shumë e mirë për futbollin shqiptar. Është normale që klubet të ndihmojnë njëri-tjetrin kur kanë nevojë. Përveç kësaj, është plus i madh për lojtarët sepse do të jenë në stërvitje intensive dhe do të mbajnë trupin në formë.
Titulli – Nuk e mendoj të lehtë. TË fitosh është gjithmonë impenjative. Por, për të arritur diçka të rëndësishme duhet të besosh gjithnjë se asgjë nuk është e pamundur dhe e paarritshme.
