Presidenti i Kosovës bekon skuadrën Olimpike disa ditë para nisjes

Presidenti i Kosvës, Hashim Thaçi është shfaqur entuziast për pjesëmarrjen e Kosovës në Lojërat Olimpike. Sipas tij më në fund ëndrra u bë realitet. Thaçi deklaroi që shpallja e Pavarësisë në Kosovë nuk kishte si synim vetëm njohjen politike, por edhe ndërkombëtarizimin e sportit.

“Është nder dhe kënaqësi që jemi mbledhur sonte këtu në prag të debutimit historik të Kosovës në Lojërat Olimpike. Debutimi i Republikës sonë në Lojërat Olimpike është përmbushje e ëndrrës tonë të shumëpritur”, tha fillimisht Thaçi.

“Në vitin 2014 jemi pranuar në Komitetit Olimpik Ndërkombëtar që solli edhe pranimin e Kosovës në 22 federata të ndryshme sportive. Në maj të këtij viti, vendi ynë u bë pjesë e UEFA-së dhe FIFA-s. Kemi Majlindën dy herë kampione e botës, tri herë kampione e Evropës, kemi Nora Gjakovën që na bëri krenar në Lojërat Olimpike në BAKU, janë edhe sportistët tjerë që shkëlqyen me paraqitjet e tyre”, shtoi numri një i vendit.