Në Shkodër gjithnjë e më tepër vazhdojnë t'i besojnë elementit të ri dhe të perspektivës. Pas firmës të hedhur në kontratë pak kohë më parë të tre futbollistëve të ekipit U19 të Akademisë së këtij klubi, tashmë bëhen realitet edhe dy firma të tjera.
Dhe ajo që është më interesantja, kemi të bëjmë me dy futbollistë në moshë më të vogël. Bëhet fjalë për dy mesfushorët Lekaj e Repaj, të datëlindjes 2000 të cilët konsiderohen si elementë me shumë perspektivë dhe për këtë arsye, klubi Vllaznia ka vendosur të firmosë marrëveshje kontraktuale me ta.
Kjo bëhet e ditur në faqen zyrtare të klubit ku thuhet: "Vazhdojnë surprizat tek Akademia e Vllaznisë. Në këtë pranverë, drejtuesit e Vllaznisë formalizojnë me sukses marrëveshjet kontraktuale edhe me dy futbollistë paratërinj. Bëhet fjalë për mbrojtësin Elmir Lekaj dhe mesfushorin Serjan Repaj, të dy këto të datëlindjes 2000 dhe që aktivizohen me sukses pranë skuadres U17.
Të reja të tilla pranë Akademisë, tregojnë përherë e më shumë interesimin dhe vëmendjen e Klubit Vllaznia në projektin e rritjes dhe formimit të brezit të ri, për të ardhmen e shpejtë. Surpriza të tjera do të vazhdojnë të shoqërojnë procesin e punës tek Akademia, për t’i dhënë përherë e më shumë rëndësi evidentimit dhe promovimit të elementëve më të spikatur pranë Akademisë së Vllaznisë,
Pavarësisht nga mosha dhe kategoria, ku ato aktivizohen". Me ardhjen e drejtorit të ri sportiv Eugent Zeka, puna e tij më tepër është fokusuar tek elementi i ri dhe në bashkëpunim me trajnerët e moshave në këtë klub si dhe me përgjegjësin teknik të Akademisë Alban Neziri, po mendojnë të ndërtojnë strategji afatgjata.
Kjo padyshim me aprovimin e drejtuesve më të lartë të klubit. Dhe këto firma të hedhura së fundi, janë treguesi më i mirë për këtë por pritet që në të ardhmen, të ketë të tjera surpriza të këndshme nga ky klub. shkodrasport.com
Lexo gjithashtu
