Maradona dhe Pele në të shkuarën janë përplasur në debate dhe kritika të ndërsjellta, por tani ata zbresin në fushë për “Ndeshjen e Paqes”.
Të buzëqeshur dhe të zhveshur nga çdo tension, dy figurat më të mëdha të futbollit botëror zbritën në fushën e improvizuar të “Palais Royal” në Paris pak orë përpara startit të Europianit.
Një ndeshje simbolike që synon të japë mesazhin e bashkimit në prag të evenimentit më të madh të futbollit europian. Në ndeshje morën pjesë edhe figura të tjera të njohura si Ciro Ferrara, Rio Ferdinand, David Trezeguet, Fernando Hierro, Dida, Marco Materazzi, Hernan Crespo, Bebeto, Angelo Peruzzi dhe Clarence Seedorf.
Maradona dhe Pele i drejtuan skuadrat nga stoli në një ndeshje që zgjati 30 minuta. Hera e fundit që ata i kishin dhënë dorën njëri-tjetrit ishte viti 2005 kur Pele u ftua nga Maradona në një program televiziv në Argjentinë.
Por nëse dy legjenda pranojnë të bëjnë paqe duke i dhënë dorën njëri tjetrit, dy emra të mëdhenj të futbollit aktual bashkohen në muzeun e Parisit. Statujat e portugezit dhe argjentinasit janë zbuluar në muzeun e kryeqendrës franceze.
