Sezone të ndryshme, e njëjta fytyrë. Është pak a shumë kjo sinteza për paraqitjen e Partizanit gjatë viteve të fundit. Të kuqtë shquhen si skuadër pragmatiste që synon të marrë rezultatin në çdo ndeshje duke lënë në plan të dytë rëndësinë e nivelit të lojës. Starti i këtij sezoni ka qenë i ngadaltë për kryeqytetasit pasi pas humbjes me Skënderbeun në javën e parë të kampionatit kanë marrë dy fitore të rëndësishme me Kamzën dhe Kastriotin. Por kjo nuk mjafton që skuadra të konsiderohet pretendente serioze për titullin. Handikapi i madh i ekipit është fakti që nuk luan me ritëm të lartë, por me kursime. Gjatë këtyre javëve vihet re që Partizani nuk jep maksimumin nga ndeshja në ndeshje pasi luan me intensitet pjesërisht, për 45 minuta. Niveli i lojës nuk e ka kënaqur as teknikun Skënder Gega, i cili bën apel që lojtarët të derdhin më shumë djersë në fushë pasi vetëm në këtë mënyrë do të jenë të aftë të përballen me çdo kundërshtar. Një tjetër shqetësim mbetet dhe luhatja e nivelit të paraqitjes së lojtarëve nga java në javë dhe për këtë shkak tekniku i të kuqve është detyruar të alternojë ndryshimet në formacionin bazë. Fitorja minimale me Kastriotin nuk i la shije të mirë Gegës. i cili duhet të trysnojë akoma më tepër mbi lojtarët e tij.
Lexo gjithashtu
