Teksa kanë kaluar 15 javë nga Kategoria Superiore e edicionit 2019-20, plot gjashtë skuadra të elitës në Shqipëri kanë zëvendësuar të paktën një herë trajnerin. Në total nga 10 ekipe pjesëmarrëse në Superligë, kemi nëntë ndërrime trajnerësh. Duket sikur pankinat në Shqipëri janë të minuara, ose përzgjedhjet e timonierëve nuk janë të duhurat.
Kështu, gjithçka nisi me Klevis Dalipin, i cili u largua nga Luftëtari vetëm disa orë përpara startit të sezonit. Te gjirokastritët një fat të njëjtë pati edhe Klodian Duro që ishte projektuar si drejtor teknik, por drejtoi ekipin në emergjencë. Në "Qytetin e Gurtë" shkarkuan edhe grekun Marantas, për t'i vënë vulën me tre trajnerë kur edne nuk është gjysma e sezonit.
Një fat jo më të mirë edhe te pesë ekipe të tjera. Tirana largoi Ardian Memën duke e zëvendësuar me Ahmataj që nuk qëndroi më shumë se 40 ditë. Flamurtari largoi Dritan Sadedinin, ndërsa nga Laçi u largua edhe Sulejman Starova. Për të mos harruar edhe largimet e Bledi Shkëmbit nga Teuta apo Lerdës nga Partizani.
Teksa në mesjavë do të luhet java e 16, vetëm katër skuadra iu kanë besuar zgjedhjeve të fillimsezonit në pankinë. Vllaznia, Bylis, Kukësi dhe Skënderbeu janë besnik të zgjedhjeve të para. Teksa dy më të rrezikuarit në start të edicionit, Dovedan i Bylis dhe Jonuz i Vllaznisë, kanë surprizuar me paraqitjet e tyre. Me nëntë të larguar në 15 javë, ky edicion i Superligës e ka vendosur tanimë një rekord.
Lexo gjithashtu
