Milan u ndal në barazim 2-2 me Bolognan në sfidën e javës së 22-të në Serie A. Një barazim që “djeg” te kuqezinjtë, të cilët tashmë kanë “larë duart” me titullin kampion.
Pas këtij barazimi, Stefano Pioli ishte padiskutim i zhgënjyer për rezultatin dhe thekson se skuadra e tij shpërdëroi shumë raste. Në lidhje me penalltinë e humbur nga Giroud dhe Hernandez, timonieri i italianëve theksoi se fati nuk ishte më të në këtë sfidë.
“Ka shumë hidhërim dhe keqardhje për faktin që nuk fituam, shpërdoruam shumë raste, pa përmendur edhe dy penalltitë. Më vjen shumë keq sepse në fushë lojtarët dhanë gjithçka, kishte shumë kualitet në lojë.
Penalltitë një problem? Giroud dhe Theo janë goditësit e parë, por ndaj Bolognas nuk patën fatin me vete. Leao më kërkoi që penalltinë e radhës ta gjuajë ai, edhe pse në stërvitje nuk shënon shumë nga 11-metrat. Ndoshta në ndeshje do të jetë ndryshe, ta shohim.
Nëse ndeshja do të përfundonte me fitoren tonë, atëherë do të kishim fituar edhe më shumë besim për të ardhmen. Megjithatë, nëse skuadra luan në këtë formë dhe krijon raste, përveç dy penalltive të humbura, do të thotë që përtej gjithçkaje paraqitja ishte ajo e duhura. Në golin e dytë të Bolognas vuajtëm një naivitet dhe e pësuam. Zirkzee? Është një lojtar i madh, e kam ndjekur prej kohësh. Lojtar fantastik që ka gjithçka”, u shpreh Pioli.
Lexo gjithashtu
