Ditën e sotme do të luhen edhe 3 takimet e mbetura të javës së 15-të të “Abissnet Superiore”, që rrjedhimisht do të jenë të fundit edhe për këtë vit. Pas fitores së Kukësi ndaj Laçit dhe Partizanit në derbi me Tiranën, tashmë është radha e 6 skuadrave të tjera për të siguruar fitoren.
Gjithçka do të nisë në orën 13:00, ku do të luhen dy takime. Erzeni pret në “Niko Dovana” skuadrën e Bylisit. Një takim interesant mes dy ekipeve që vijnë nga Kategoria e Parë. Shijakasit vijnë pas humbjes me Laçin një javë më parë dhe sot do të synojnë të bëjnë autokritikën, ndërkohë nga ana tjetër ballshiotët siguruan një fitore spektakolare ndaj Egnatias.
Në Kamëz në të njëjtën orë do të luhet përballja mes Kastriotit dhe Egnatias. Një tjetër duel i rëndësishëm për ekipet. Krutanët në shtëpi duan 3 pikët për t’iu larguar sa më shumë zonës së ftohtë, ndërsa rrogozhinasit e Shpëtim Duros kërkojnë fitoren për të “kërcënuar” kampionët në fuqi pas humbjes së mbrëshme.
Vitin 2022 do e mbyll përballja mes Vllaznisë dhe Teutës, me takimin që do të luhet në “Air Albania” duke nisur që nga ora 15:45. Durrsakët të udhëhequr nga Edi Martini duan fitorne e 3-të rresht për të lënë fundin e klasifikimit, por përballë gjejnë shkodranët që pas dy humbjeve nuk u lejohen më hapa fals në klasifikim.
