Mbështetja e tifozëve nuk i ka munguar kurrë Kombëtares së Shqipërisë në ndeshjet e zhvilluara brenda dhe jashtë vendit. Tifo-grupet nga të gjitha trevat ku flitet shqip, nuk mungojnë të jenë prezent në stadium, shtoji atyre edhe tifozët të thjeshtë që kërkojnë me çdo kusht të japin mbështetjen e tyre ndaj Përfaqësuese dhe pse jo, të jenë dëshmimtarë “live” të arritjeve të mëdha të ekipit kuqezi.
Së fundmi, Kombëtarja ka gjetur mbështetje edhe nga tifo-grupi "Illyrian Elite", i krijuar 3 muaj më parë. “Debutimi” i tifo-grupit në fjalë daton më 3 qershor të këtij viti në sfidën miqësore që Shqipëria zhvilloi kundër Ukrainës në Bergamo.
Në një intervistë të zhvilluar me “Newsport.al”, tregohet edhe misioni i tifo-grupi i "Illyrian Elite", preket tema e largimeve të lojtarëve kosovarë nga Kombëtarja kuqezi drejt asaj të Kosovës.
Sa kohë ka që është krijuar tifo-grupi juaj dhe cila ka qenë ndeshja e parë që jeni organizuar për të parë Kombëtaren?
-Ka rreth 3 muaj që jemi krijuar si tifo-grup. Ndeshja e parë e organizuar ishte ajo në Bergamo në miqësoren kundër Ukrainës.
-Pse ky emërtim "Illyrian Elite"? Ka ndonjë arsye të veçantë që e keni emërtuar kështu?
-Është vendosur spontanisht dhe nuk ka ndonjë arsye të veçantë.
- Sa anëtarë të regjistruar numëron tifo-grupi juaj?
-Rreth 120 anëtarë.
- Ka ish-pjesëtarë të tifo-grupit “Tifozat Kuqezi” në radhët e "Illyrian Elite"?
-Po, ka.
- Nga cilat treva të Shqipërisë përbëhet më shumë tifo-grupi?
-Më së shumti janë nga Ilirida dhe Dardania, por kemi edhe mjaft tifozë nga Shqipëria.
- Është parë një mungesë vëmendjeje nga ana e mediave për tifo-grupin tuaj. Cila mendoni se është arsyeja?
-Nuk e vrasim shumë mendjen për mediat. Nuk e bëjmë këtë gjë që të fitojmë vëmendje mediatike.
- Çfarë mendoni për largimet e fundit nga Kombëtarja kuqezi drejt asaj të Kosovës?
-Vetëm kush nuk e ndjen veten shqiptar, nuk luan për Shqipërinë. Kjo është shumë e thjeshtë.
- Me cilin tifo-grup tjetër shqiptar keni marrëdhënie bashkëpunimi?
-Nuk jemi kundër asnjë tifo-grupi, por edhe bashkëpunime konkrete nuk kemi pasur deri më tani. Gjithsesi, në Shkodër na u bashkuan anëtarë të ndryshëm nga tifo-grupe shqiptarësh.
- Besoni se do të keni sukses në këtë nismë qe keni marrë dhe si janë marrëdhëniet tuaja me TKZ?
-Ne nuk kërkojmë sukses, po duam vetëm ta mbështesim Kombëtaren me një mentalitet ndryshe. Sa i përket TKZ-së ne kemi qenë vetë pjesë e tifo-grupit “Tifozat Kuqezi” dhe kemi shumë shokë aty. Për ne vlen Shqipëria mbi të gjitha, kështu që emri i një grupimi s’ka rëndësi. Mjafton të jetë qëllimi i përbashkët.
Lexo gjithashtu
