Ditën e djeshme u publikua lajmi i bujshëm rreth arritjes së akordit mes Kukësit dhe ish-lojtarit të Partizanit Mentor Mazrekaj.
Sipas informacioneve të publikuara fillimisht në mediat kosovare, lojtari aktualisht pjesë e Prishtinës ka biseduar me drejtuesit e verilindorëve, e më konkretisht me drejtorin dhe ish-shokun e tij te Partizani Nderim Nexhipi, dhe palët kanë rënë dakort për kushtet.
Vetë presidenti i Kukësit Safet Gjici mësohet të ketë miratuar ardhjen e Mazrekaj me kusht që ai t’i vlejë skuadrës dhe të mos jetë i dëmtuar. Gjithashtu ai ka kërkuar që fjalën e fundit ta ketë trajneri Armando Cungu, nëse i duhet Mazrekaj në skuadër apo jo.
Në këtë mënyrë brenda dy ditëve të ardhshme tekniku shkodran pritet të vendosë përfundimisht nëse ish-fantazisti i kuq do jetë pjesë e Kukësit apo jo, ku pasiguria e vetme mesa duket mbetet forma fizike e kosovarit.
Loading ...
