Orges Shehi ka qenë njeriu kryesor në mediat sportive shqiptare këtë javë të fundit. Trajneri i Tiranës ishte në skadencë kontrate dhe mbi të rrotullohej rinovimi dhe ofertat nga Shkëndija e Tetovës dhe Vllaznia. Në fund, durrsaku vendosi të rinovojë me bardheblutë dhe nis kështu sezonin e tij të tretë me 26 herë kampionët e vendit.
Në një lidhje drejtpërdrejtë me emisionin “Skaner” nga Gerti Çarçani në MCN, Shehi foli gjerë e gjatë për të gjitha çështjet: Arsyet e rinovimit, refuzimi i medaljes në Kupë, merkato dhe objektivat e klubit.
“Në fund të Tirana-Egnatia, mund të keni parë një fytyrë të mërzitur. Nuk doja të vendosja në qafë medaljen e vendit të dytë, sepse i dyti, është humbësi i parë. Thjesht nuk kam dashur medaljen e vendit të dytë, e kam bërë gjithmonë këtë. Kam mërzi, sepse i shkova afër dy trofeve dhe nuk mora asnjërin.
Kam një lidhje të veçantë me lojtarët. Edhe ata kanë luajtur një pjesë shumë të rëndësishme për rinovimin. M’u shfaq një video në monitor, ku të gjithë lojtarët kërkonin që unë të qëndroja. Ishte një video emocionuese, që më dha shtysë për marrjen e vendimit për rinovim.
Ndihem shumë i lumtur që në këto dy vite, kam arritur të kem këtë impakt të mirë te tifozët. I falënderoj dhe i them se do bëjmë të pamundurën që ata të jenë të kënaqur.
Europa me kampionatin, janë të bashkëngjitura. Duhet të plotësojmë grupin dhe pastaj të futemi me idenë që kemi pasur këto dy vite. Kemi disa lojtarë që kanë oferta. Pas Europës do jemi më të plotë. Europa është shumë shpejt, ka kohë për kampionatin.
Aleksin e kam dashur shumë te Tirana. Dua që ai të jetë pjesë e skuadrës, siç e do edhe ai. Është në bisedime se bashku me Hilën, të cilët klubi do t’i mbajë.
E donim trofeun e Kupës, jo se Tiranës i mungojnë trofetë, por e doja për situatën që është krijuar. E donim për sakrificën e skuadrës, që luajtën 100 minuta me 1 lojtar më pak. Doja ta fitoja për lojtarët më shumë. Do ishte një përballje e mirë me Partizanin në Superkupë, por nuk u realizua.
Kur vjen fundi i kampionatit, kërkohet të merret më e mira. Kur çdo gjë nuk shkon si dëshiron, mërzia është e madhe, sepse nuk ke kohë të rikuperosh. Në fund të kampionatit, trajnerit, por edhe lojtarëve, mund t’iu përfundojë kontrata. Kanë qenë dy ditë shumë intensive dhe me ngarkesë, për t’u vendosur e ardhmja ime. Morëm vendimin që të vazhdojmë dhe të tentojmë të marrim maksimumin për sezonin tjetër.
Rinovimi më herët? Ne në Shqipëri jetojmë dhe gjërat i lemë për në moment të fundit. Nuk është gjithçka trajneri. Trajneri është projekt dhe skuadra. Na është dhënë garanci, që do jemi skuadër që lufton për objektiva madhorë, siç e ka statusin klubi. Shumica e lojtarëve janë me kontratë, por janë edhe disa që duhen zëvendësuar. Ato tetë lojtarë që kemi me kontratë, të marrim edhe të tjerë, me përforcimet që të jenë në nivel të mirë dhe të synojmë objektivat madhorë.
Nga Disiplina, vetëm dy lojtarë janë me dënime të gjata. Është mundësia e apelimit, që klubi e ka bërë. Lojtarët duhet të jenë të gatshëm për Europën, nëse nuk janë në Europë, do të jetë shumë e vështirë.
Tani mund të them se nga dallga nuk jemi mbytur. Kemi dalë në sipërfaqe. Do fillojmë të notojmë. Nga garancitë që kemi marrë, ai do tentojë të sjellë lojtarë cilësorë, që do kenë edhe kosto. Këtë garanci e kemi marrë.”-tha Shehi.
