Presidenti I Federatës Shqiptare të Basketbollit, Avni Ponari I ka dërguar një letër të gjithë anëtarëve të komunitetit të koshit, teksa thekson se ka nisur puna për sezonin e ri.
Ponari kërkon një ligj sponsorizimesh sipas nevojave të kohës, teksa në krye të herës shprehet se sporti në Shqipëri nuk është vetëm futbolli.
Reagimi:
Të nderuar dashamirës të sportit, uroj që fryma bashkëpunuese të mbizotrojë dhe pas shumë vitesh përpjekjesh, të kemi një ligj sponsorizimesh që i përgjigjet kërkesave të kohës dhe nevojave të sportit.
Fatkeqsisht në Shqipëri është krijuar ideja që sporti është vetëm futbolli. Diferencat ekonomike dhe organizative janë shumë të mëdha ndërmjet futbollit dhe basketbollit, ashtu si në pjesën më të madhe të Europës. Gjithsesi vlerat dhe kontributi publik i sportit, nuk matet me para...
Në Shqipëri ka dhe Basketboll!
Tashmë, vetëm në Tiranë, ka me mijëra fëmijë që marrin emocionet pozitive të basketbollit duke ndihmuar kështu në rritjen e tyre të shëndetshëm fizikisht dhe psikologjikisht.
Në bashkëpunim me shoqatat anëtare pjesëmarrëse në aktivitetet e edicionit 2019-20, bëmë të gjitha përpjekjet për të mbyllur kampionatet kombëtare në parket, por nuk ja dolëm.
Për NE, Covid-19 u shpall fitues për edicionin 2019-20!
Pavarësisht gjithë vështirsive, FSHB po punon për fillimin e edicionit 2020-21. Në ditët në vijim fillojmë me Seminaret sezonale për trajnimin e aktorëve kryesorë në menaxhimin dhe mbarëvatjen e ndeshjeve, duke filluar nga mbajtësit e statistikave, gjyqtarët dhe komisarët. Gjithashtu jemi në hapat e fundit për përfundimin e Rregullores 2020-21 dhe paralelisht po punohet për organizimin e seminarit me trajnerët për ndryshimet më të fundit në rregulloren zyrtare të lojës së basketbollit sipas udhëzimeve të FIBA.
Liga Unike tashmë ka nisur punën me administratën e sajë, emocione të reja na presin...
Ne po punojmë, por akoma nuk kemi lejen e shumë kërkuar... ajo leje që caktoi COVID-19 si fitues të edicionit 2019-20, ajo leje e munguar po vazhdon të cënojë dhe të ardhmen, 2020-21.
Duke shpresuar në një ligj sponsorizimesh që krijon ambjent të përshtatshëm për të afruar sponsorët në sport, dëshiroj të ju siguroj se mbetemi të motivuar për të përmirsuar veten dhe për të bërë më shumë për Basketbollin, pavarësisht se jo cdo gjë është në dorën e FSHB.
Me Mirënjohje,
Avni PONARI
Lexo gjithashtu
