Egnatia është shembulli që padyshim duhet ndjekur nga çdo skuadër që vjen për herë të parë në Superiore. Rrogozhinasit do të luajnë në Europë dhe për këtë presidenti Agim Demrozi i ka planet e qarta. Edlir Tetova do të jetë në krye të skuadrës dhe së shpejti skuadra do të udhëtojë drejt Ohrit për fazën përgatitore.
Burime të besueshme pranë klubit të Egnatias bëjnë me dije për Newsport.al që drejtuesit kanë zgjedhur Maqedoninë e Veriut si vendin në të cilin do të përgatiten për Kupat e Europës. Ndërkohë po punohet intensivisht në merkato për të plotësuar mangësitë në çdo repart të fushës.
Kujtojmë që për herë të parë, Egnatia arriti të fitonte Kupën e Shqipërisë në historinë e futbollit shqiptar. Gjithashtu u pozicionua edhe në vendin e tretë të Abissnet Superiore duke zhvilluar një sezon fantastik. Drejtuesit janë shprehur se në edicionin e ri do të synohet pa më të voglin dyshim titulli kampion.
