Edhe ekipi kampion i Superligës së Kosovës mbështetë Fadil Vokrrin. Feronikeli i ka thënë “po” paralajmërimit të kryetarit të Federatës së Futbollit të Kosovës, Fadil Vokrrit, për ndërprerjen e garave.
Një gjë e tillë vjen pas neglizhencës së institucioneve shtetërore për infrastrukturën futbollistike në vend, për shkak të të cilit klubet kosovare mund të mbeten përsëri pa dalë në Kupat e Europës.
Pas ekipit bardheblu të Prishtinës, që doli zyrtarisht në anën e Vokrrit, një gjë të tillë e bën edhe Feronikeli, me konfirmimin që vjen nga zëdhënësi Shaban Mehmeti.
“Feronikeli është ndër klubet që ka investuar në të gjitha aspektet për t’u licencuar dhe infrastruktura është kriteri i vetëm që s’po mund ta plotësojmë. Ne rreshtohemi pas FFK-së dhe kryetarit Vokrri pas paralajmërimit për ndërprerjen e garave, sepse ky vendim i FFK-së është në mbrojtje të klubeve”, deklaroi Mehmeti për “GazetaOlle.com”.
Mbetet të shihet nëse Ministria e Sportit do të zgjohet nga gjumi i thellë, për t’iu hapur dritaren ndërkombëtare klubeve kosovare.
Loading ...
