Tre lojtarë janë larguar nga Kukësi. Klubi verilindor nëpërmjet një njoftimi në faqen zyrtare bën me dije që Bekim Dema, Felipe Moreira dhe Fjoart Jonuzi nuk do të jenë më pjesë e verilindorëve. Ata kanë ndërprerë me konsensus kontratën dhe tashmë janë lojtarë të lirë. Kukësi i falënderon ata për kontributin e dhënë.
“Me fillimin e merkatos së janarit kanë nisur edhe lëvizjet e para për skuadrën e Kukësit. Tre mesfushorët Bekim Dema, Felipe Moreira dhe Fjoart Jonuzi i kanë dhënë fund aventurës me klubin verilindor. Shkodrani, braziliani dhe kuksiani kanë gjetur akordin me klubin për të prishur marrëveshjen dhe janë ndarë me mirëkuptim të plotë.
Ekipi i Kukësit nuk është bërë pengesë për futbollistët dhe i ka lënë të lirë. Klubi verilindor i falenderon të tre futbollistët për kontributin e dhënë dhe i uron suksese në karrierën e tyre futbollistike”, shkruhet në njoftimin e Kukësit.
Kujtojmë që të 3 lojtarët nuk kanë gjetur hapësira të mjaftueshme në organikën e Gjokës dhe tashmë kanë vendosur të largohen nga Kukësi.
