Ilir Daja do të jetë trajner i Skënderbeut. Tekniku kryeqytetas do të prezantohet nesër te kampionët e Shqipërisë, për të vijuar punën e lënë nga italiani Andrea Agostineli. Ashtu siç newsport.al bëri me dije para disa ditësh, drejtuesit bardhekuq kanë vendosur t’ia besojnë drejtimin e skuadrës një trajneri më përvojë siç është Ilir Daja. Objektivi i Skënderbeut në fillim të sezonit ishte fitimi i titullit kampion.
Megjithatë përfundimi i dy fazave në vend të tretë i ka lënë shije të hidhur Takajt, i cili tashmë ka vendosur në krye të pankinës 50-vjeçarin kryeqytetas. Pas zyrtarizmit të Dajës, menjëherë do të niset të mendohet për merkaton e dimrit, ku priten të afrohen disa futbollistë cilësorë për të plotësuar mangësitë e kampionëve në fushën e blertë.
Ilir Daja është një trajner me eksperiencë në kampionatin shqiptar. Ai e nisi këtë sezon me Tiranën, megjithatë u largua nga drejtimi i bardhebluve pas disa rezultateve jo pozitive. Daja ka drejtuar Besën e Kavajës, Dinamon dhe së fundmi do të marrë “timonin” e Skënderbeut të Korçës.
Loading ...
