Partizani arriti të fitonte dje kundër Teutës në transfertë me rezultatin 2-0. Kjo sfidë ishte e vlefshme për javën e 27-të të Superiores me të kuqtë dukshëm superiorë në fushë. Pas takimit, kishte vend për festë në kampin e kuq.
Dhe nuk mund të mungonte edhe njëri nga lojtarët që ka dhënë kontributin e tij deri në janar. Bëhet fjalë për Eneo Bitrin, i cili ishte në një “video-live” me Valentino Muratajn. Batutat mes tyre nuk mungonin, ndërsa në qendërmbrojtësi e bëri fakt të kryer titullin kampion për Partizanin.
“Kush do të ma presë mua biletën në maj për të festuar titullin e kuq?”, ishte pyetja e Bitrit për Muratajn, i cili shtoi në atë live edhe Rrapajn me Carën. “Do të vi për të festuar, do të vi. Po Skuka kush është? Se nuk e njoh”, përfundoi duke qeshur ai.
Siç shihej edhe në lidhjen mes tyre, atmosfera në kampin e kuq është mjaft pozitive. Partizani duket në rrugë të mbarë drejt titullit të 17-të kampion, megjithatë deri në fund kanë mbetur edhe 9 javë.
