Kryeministri Edi Rama, nëpërmjet një postimi në faqen e tij zyrtare në “facebook” ka reaguar duke u shprehur krenar për atë çka kuqezinjtë dhanë në këtë kompeticion. Sipas tij ishte arsyeja e golaverazhit që e ndëshkoi kombëtaren tonë. Ai gjithashtu i bën thirrje gjithë shqiptarëve për një pritje heroike të djemve kuqezi ditën e nesërme që shkruajtën historinë në Francë.
” Sapo u mbyll kapitulli më fantastik i futbollit shqiptar dhe pas një eliminimi për arsye të golaverazhit, misioni kuqezi në EURO2016 kthehet nesër në atdhe rreth orës 17.00. Le t’u dhurojmë heronjve tanë një festë të paharrueshme mikpritjeje, në shenjë mirënjohje e respekti për kontributin e tyre të jashtëzakonshëm për fanellën dhe imazhin e Shqipërisë”, përfundon i pari i qeverisë.
