Lojtarëve kuqezinj gjatë Kampionatit Europian iu rrit vlera e kartonit, pasi bënë përfaqësim dinjitoz në këtë kompeticion, i cili ishte vitrina më e mirë për ta. Në sulm janë hedhur ekipe nga mbarë Europa për të marrë shërbimet e tyre, ndërsa kuqezinjtë preferojnë Bundesligën 1 në Gjermani dhe Serie A në Itali.
Mirëpo, nuk mungojnë dhe ftesat që i bëjnë njëri-tjetrit në skuadrat ku luajnë. Mesfushori Ledjan Memushaj, i cili është dhe kapiteni i Pescara-s, skuadër që do të militojë në Serie A këtë sezon, në një intervistë për mediat italiane ka thënë se dëshiron Arlind Ajetin ta ketë përkrah tij: “Arlindi është një mbrojtës i madh, kur mësova se Pescara po e ndiqte, fola me të. I tregova për ngjitjen në Serie A, për klubin, për qytetin. Mua do të më pëlqente ta kishim në ekip, por janë çështje që nuk më përkasin në mënyrë të drejtpërdrejtë”.
