Tirana fitoi pastër me rezultatin 3-0 ndaj Korabit duke siguruar biletën për në çerekfinale të Kupës së Shqipërisë. Golat për bardheblutë u shënuan nga Lulaj në pjesën e parë dhe Latifi me Hoxhallarin në të dytën. Pas ndeshjes trajneri Julian Ahmataj dha prononcimin e tij për mediet.
“Duke parë edhe terrenin e fushës bëmë një 70 minutësh shumë të mirë. Duhet ta mbyllnim kualifikimin pasi terreni dhe ana psikologjike mund të ndikonte në ndeshje. Jam i kënaqur me atë që dhanë lojtarët dhe tani do të shohim përpara.
Kemi një brez shumë të mirë lojtarësh që do kohë dhe komoditet për të treguar aftësitë e tyre. Edhe terreni nuk i lejonte të shpreheshin si duhet. Ata duhet të marrin minuta sa të munden për t’u përmirësuar dhe për të pasur një të ardhme me Tiranën.
Skënderbeu? Ndeshja e rradhës është e vështirë, nuk ka lidhje me Kupën. Duhet një impenjim maksimal dhe duhet të jemi shumë të shpejtë për të bërë atë që ne duam të ndërtojmë në lojë”, deklaroi Ahmataj.
Lexo gjithashtu
