Trajneri i Tiranës ka dhënë një intervistë për Supersport nga Antalia, aty ku prej disa ditësh bardheblutë po kryejnë fazën përgatitore.
Mirel Josa ka folur për miqësoren e humbur sot ndaj FC Tobol, për dëshirat e merkatos dhe për sulmuesin moldav, Petru Leuca.
-Cila është përshtypja juaj pas miqësores kundër Tobolit?
-Mund të them, pozitive. Në pjesën e parë ekipi më pëlqeu shumë. Por, duhet pranuar që kemi pasur shumë mungesa dhe zëvëndësimet e bëra, bënë që skuadra kundërshtare të bënte një pjesë të dytë më të mirë dhe të fitonte ndaj nesh.
-Shumë diskutime ka në lidhje me mungesat?
-Po, kemi lojtarë të dëmtuar. Për këtë arsye, Muça dhe Kërçiku kanë shkuar në Tiranë për të të ekzaminuar problemet. Pjesa tjetër e skuadrës ka pasur problem me udhëtimet. Nuk shoh realisht ndonjë problem madhor, por sigurisht që do të doja t’i kisha të gjithë. Do isha i kënaqur t’i kisha të gjithë në dispozicion. Megjithatë mendoj se janë gjëra të rikuperueshme. Taku përshembull ka mbërritur pardje por do ta marrë veten shpejt.
-Kampionati do shtyhet, po qëndirmi juaj në Turqi?
-Po, besoj do qëndrojmë disa ditë më shumë në Turqi.
-Ç’përshtypje iu ka lënë sulmuesi moldav që ka ardhur në provë?
-Sulmuesi Leuca ka disa ditë në provë. Nuk është keq. Në përgjithëis ka aftësi teknike, por fizikisht ende nuk është aty ku duhet. Luan disi mirë larg portës, por ne na duhet një shënues i regjur në këtë moment. Nuk e di do vendosim në ditët në vinjim.
-A është Elis Bakaj blerja e re e klubit?
-Pëlqimin tim e kam dhënë. Madje do isha i lumtur ta kisha në skuadër dhe nëse do kishim super kontingjent në vijën e parë. Kemi shumë nevojë për të dhe vlerat e tij janë të padiskutueshme. Megjithatë dueht ta vendosë klubi me lojtarin këtë çështje.
-Megjithatë kontingjenti në sulm duket i cunguar. Vetëm Halili është aty, që shënoi dhe në miqësore?
-Kemi problem në këtë repart. Ndoshta për këtë arsye po e bëj dhe skemën 3-4-3 në mënyrë që të balancojmë dhe forcat tona sulmuese dhe mesfushorët të jenë më afër me vijën e parë. Nuk është çështje vetëm individësh. Lojtarët duhet të marrin më shumë përgjegjësi dhe e them këtë me bindje.
-Ndryshimi i skemës është një dëshirë e juaja apo nevojë?
Nuk mund të them dëshirë. Duke pasur parasysh lojtarët që kam në dispozicion do shohim çfarë do ndodhë deri në javën e parë kundër Teutës.
