Thonë se në jetë luan një rol të madh fati, por në fakt në futboll kjo shprehje duket se nuk gjen shumë vend. Shumë punë, kokëulur dhe me ambicie të qarta. Përfundimi? E shikon veten të luash në Europë për ekipe të njohura europiane. Kështu i ka ndodhur edhe Lirim Kastratit, 18-vjeçarit të talentuar që ka dhënë një intervistë ekskluzive për newsport.al.
Sulmuesi i Lokomotivës së Zagrebit të U-19 ishte protagonist në Champions League për të rinjtë, pasi arriti t’i shënonte Dinamos së Bukureshtit. Nga skuadra amatore e Kikës, te Shkëndija e Tiranës dhe tashmë në kampionatin kroat me një nga ekipet më të njohura, Lokomotivën e Zagrebit. Në pak muaj, Kastrati ka arritur t’i bëjë për vete të gjithë.
Por, ai ka një peng në këtë karrierë të ndritur që sapo ka nisur, Kombëtaren. Prej disa kohësh është lënë në harresë. Ai është pjesë e Kosovës U-19, por dëshira e tij është të luaj vetëm për kuqezinjtë. Madje arrin aty derisa thotë: “Ne kemi vetëm një flamur. Ai i Kosovës nuk është i vërtetë”.
– Një hap i madh në karrierën tënde, nga Shkëndija e Tiranës te Lokomotiva e Zagreb, si është e mundur?
Ju falënderoj për intervistën. Për mua është kënaqësi e madhe të flas për një media të vendit tim. Te Lokomotiva e Zagrebit jam transferuar në shkurt e tashmë jam ambientuar mjaft mirë.
– Shënuat një gol mjaft të rëndësishëm në Champions League, për të rinjtë. Si u ndjetë?
Po është e vërtetë. Luajtëm kundër Dinamos së Bukureshtit dhe arrita të shënoja golin e parë. Emocionet ishin të shumta, megjithatë vendosmëria për të bërë më shtyu të përqëndrohesha edhe më shumë në lojë.
– Çfarë të shkoi në mendje në atë moment?
Të gjithë sakrificat që kam bërë për të arritur këtu ku jam sot.
– Kujt ia dedikoni suksesin tuaj, nëse mund ta quajmë të tillë, pasi jeni akoma i ri?
Shumë pak njerëzve që më kanë dashur të mirën që në fillimet e mia.
– Cilat janë synimet e tua?
Dua të jem simbol i të gjithë shqiptarëve.
– Simbol i të gjithë shqiptarëve është shqiponja dykrenare…
E kisha me idenë që të gjithë shqiptarët të krenohen me mua. Të arrij majat në futbollin europian dhe të kenë me kë të mburren.
– Keni marrë ftesë nga Kombëtarja U-19?
Jo, s’kam marrë. Para dy vitesh isha pjesë e U-17-ës. Kam qenë një herë në grumbullim me U-19, por kisha gishtin e thyer. U futa ashtu në lojë dhe të gjithë më bënë komente pozitive. Më pas nuk më thirrën më.
– Cila është arsyeja apo s’e morët vesh kurrë?
Nuk e di. S’besoj se kam unë një përgjigje për këtë.
– Tashmë i jeni bashkuar Kosovës U-19?
Po i jam bashkuar sepse më kanë ftuar. Por, dua të them sërish që dëshira ime është të luaj për Kombëtaren U-19.
– Domethënë do ta linit Kosovën për Shqipërinë?
Dëshira ime është të kontribuoj për flamurin e vërtetë, shqiponjën kuqezi dhe asnjë tjetër.
– Edhe flamuri i Kosovës është fizikisht i vërtetë…
Jo, aspak. Shqiptarët kanë vetëm një flamur dhe për atë flamur dua të luaj dhe unë.
– Si i komenton zgjedhjet e Rashicës, Rrahmanit dhe disa të tjerëve që lanë Shqipërinë për Kosovën?
Besoj se nuk kanë pasur vend në formacionin titular dhe ndaj janë larguar.
– Pra, edhe ju nëse s’iu japin një vend titullari, do të largoheshit?
Jo, asnjëerë pasi kam besim te aftësitë e mia dhe besoj se do të jem titullar duke kontribuar për fanelën kuqezi.
– Po ke një kërkesë publike për Erjon Bogdanin?
Më merrni në Kombëtare vetëm për një ndeshje. Vetëm 10 minuta më lini në fushë dhe pastaj vendosni ju nëse do të mbani apo jo. Kaq i kërkoj, vetëm 10 minuta lojë.
– Flitet se në Kroaci po përgatisin dokumentet për t’iu marrë në Kombëtare. Është e vërtetë?
Po është e vërtetë, ma kanë komunikuar, por u kam thënë që pres Shqipërinë
– Ju jeni edhe pjesë e skuadrës së parë apo jo?
Po jam grumbulluar disa herë me ekipin e parë të Lokomotivës, si në ndeshjen ndaj Rijekës, kampionatit të Kroacisë. Te U-19 jam lojtar kryesor, ndërsa në ekipin e parë më thirrin shpesh.
– Një mundësi tjetër para se të fton Shqipëria do ta ndërronte mendjen?
Asnjëherë. Jam i bindur në aftësitë e mia dhe kam besim që do të më marrin shumë shpejt.
– A keni pasur paragjykime në Kroaci se jeni shqiptar?
Nëse je i mirë dhe sheh punën tënde të do edhe shteti serb.
– Kush të ka ushqyer me kaq shumë dashuri për Shqipërinë?
Babai im. Është ëndrra e tij të më shohë në fushë me fanelën kuqezi.
– Gjatë gjithë kësaj interviste mendon se ka harruar diçka?
Jo, nuk kam harruar. E lashë vetë për në fund. Dua të falënderoj klubin e KF Kikës për kontributin e dhënë për mua. Është një ekip në fshatin Hogosht pranë Gjilanit dhe gjej rastin të përshëndes të gjithë tifozët, veçanërisht tifo-grupin “Ultar-Luanët”. Suksesi im i dedikohet atyre. /Retin TOKA/