Përmes një lidhje telefonike direkte për emisionin "Procesi Sportiv", Drejtori Sportiv i Lacios, Igli Tare foli për ndeshjen Itali-Shqipëri, për Strakoshën dhe për planet e tij për të ardhmen.
"Është një ndeshje e rëndësishme edhe për Italinë, sepse një fitore ndaj Shqipërisë do t'i jepte mundësinë të luante një 'finale' kundër Spanjës.
Ende nuk flitet shumë për këtë ndeshje në media. Por, nga nesër do të nisin të shkruajnë.
Shqipëria nuk është një ekip për t'u nënvlerësuar. Unë mendoj se Italia i ka marrë masat me kohë për ndeshjen kundër nesh.
Strakosha apo Alban Hoxha? Strakosha ka fituar shumë siguri në 2-3 muajt e fundit. Fakti që ai do të luajë si titullar në ndeshjen e parë me Shqipërinë unë e shoh shumë pozitive në aspektin psikologjik për Strakoshën. Ai është i së ardhmes më shumë.
Si mund të mposhtet Italia? Vetëm duke luajtur si skuadër kompakte. De Biazi e ka përgatitur shumë mirë këtë ndeshje dhe mendoj se nuk do të bëj të njëjtin gabim si me Spanjën që u mbyll në prapavijë.
Nuk kemi asnjë arsye që të luajmë pa besim kundër Italisë. Shqipëria e ka nivelin për të vënë në vështirësi çdo kundërshtar.
Stadiumi i Palermos ka një atmosferë shumë të mirë. Unë kam luajtur vetë në atë stadium. Ai ambient është shumë i bukur për të luajtur futboll", tha Tare.
Pyetjes së gazetarit Gëzim Sinemati se përse ai qëndron disi indiferent në lidhje me 'hallet' e futbollit tonë, Tare u shpreh: "Kur je nga jashtë e ke të lehtë të kesh sy kritik. Unë nuk dua ta bëj një gjë të tillë, sepse kam respekt për njerëzit që punojnë në FSHF. Unë e kam thënë edhe më parë në mediat italiane që figurat e futbollit shqiptar që kanë punuar jashtë, të japin kontributin për futbollin tonë. Por, një gjë e tillë duket pak e largët. Unë jam shumë i lumtur te Lacio, sepse jemi duke luajtur për objektiva shumë të mëdha në këto momente. De Biazi? I uroj të rrijë ende te Kombëtarja jonë, sepse i ka treguar vlerat e tij", deklaroi Drejtori Sportiv i Lacios.
Lexo gjithashtu
