Mbrojtësi i Kukësit, Rrahman Hallaçi, ka folur për “Super Sport” mbi përgatitjet e Kukësit para ndeshjes së kthimit ndaj Austrisë së Vjenës. Ai është ndalur të komentojë humbjen në ndeshjen e parë dhe shanset e Kukësit për përmbysje në ndeshjen e kthimit.
“Kur morëm vesh emrin e kundërshtarit nuk është se e kishim frikë Austrinë e Vienës por kuptohet që do kishim vështirësi, pasi bëhej fjalë për një skuadër që ka fituar shumë herë titullin kampion në Austri dhe është një skuadër me shumë traditë dhe me histori të madhe. Megjithatë jo gjithmonë ekipet që janë kaq të njohura në fushë bëjnë historinë sepse vlerat e skuadrave ndryshojnë kur fillon loja. Besoj se e keni parë të gjithë ndeshjen, ndoshta nuk zhvilluam një pjesë të parë shumë të mirë, por u mbrojtëm mirë besoj, pastaj në pjesën e dytë ndryshuan gjërat po e menaxhonim lojën shumë mirë, kishim edhe raste për të shënuar dhe kjo tregon që forca jonë është pse jo në nivelin e tyre. Mendoj se kemi shanse për tu kualfikuar, sepse ne në Austri mund të shënonim një apo dy gola. Prandaj mundësitë i kemi për të realizuar ndaj tyre. Duhet të jemi të përqëndruar sepse është një ndeshje shumë e rëndësishme që do të vendosë fatet tona”, tha Hallaçi.
Ai gjithashtu u bëri thirrje shokëve të skuadrës që të jenë mjaft të kujdesshëm në takimin e kthimit pasi rezultati 1-0 është mjaft I vështirë për t’u përmbysur.
“Rezultati 1-0 është një rezultat i mirë për ata, kjo për vetë faktin sepse ne sduhet të pësojmë gol sepse në të kundërt misioni bëhet shumë i vështirë. Duhet të tregohemi shumë të kujdesshëm në mbrojtje dhe njëkohësisht ta hedhim vështrimin edhe nga sulmi sepse na duhet të shënojmë patjetër. Sigurisht që po të ishte rezultati 1-1 do të ishte një histori, tjetër por Emini është një sulmues profesionist dhe e ka treguar veten. Ai rast i humbur mund ti ndodhë kujtdo por unë personalisht kam shumë besim te Emini por edhe te lojtarët e tjerë dhe të gjithë do të japin maksimumin në sfidën e kthimit”, shtoi mbrojtësi.
Hallaçi gjithashtu bëri një koment për paraqitjen e futbollistëve të ardhur nga Skënderbeu në huazim.
“Mendoj që kanë bërë një paraqitje shumë të mirë, sepse shumë pak kohë kishin, por jam i mendimit që janë shkrirë me ekipin shumë shpejtë dhe kanë dhënë maksimumin e tyre. Kuptohet që kanë nevojë për kohë por jam i sigurtë se lojtarët e huazuar nga Skënderbeu ndeshjen tjetër do të japim akoma edhe më shumë”, përfundoi ish-kapiteni i Kukësit.
Lexo gjithashtu
