Komisioni i Disiplinës nuk është kursyer aspak në vendimet disiplinarë për javën e fundit të futbollit shqiptar. Një nga ekipet më të dëmtuara është Egnatia, të cilës i mbyllet stadiumi për pjesën e mbetur të sezonit. Veç kësaj janë dënuar edhe presidenti Demrozi me 4 ndeshje ndërsa zyrtari Klejdi Zenelaj me 6 ndeshje.
Një goditje fatale për rrogozhinasit që këtë sezon kanë qenë një nga ekipet me numrin më të lartë të tifozëve në stadium me një mesatare prej 2000 prezencash.. Një armë më pak për Egnatian që garon për një vend në Kupat e Europës teksa janë në vendin e tretë aktualisht.
Vendimet e Komisionit të Disiplinës dhe Etikës së FSHF datë 30.03.2023
- Zyrtari i KF Egnatia, Agim Demrozi,për protestë ndaj vendimeve të zyrtarëve të ndeshjes, në bazë të nenit 55/2 të KDS dënohet me 4 (katër) ndeshje pezullim nga aktiviteti. Në zbatim të nenit 20 të KDS, zyrtarit i ndalohet hyrja në të gjitha stadiumet, në aktivitetet sportive të organizuara nga FSHF, deri në përfundim të dënimit.
- Zyrtari i KF Egnatia, Klejdi Zenelaj,për protestë ndaj vendimeve të zyrtarëve të ndeshjes, në bazë të nenit 55/2 të KDS dënohet me 6 (gjashtë) ndeshje pezullim nga aktiviteti. Në zbatim të nenit 20 të KDS, zyrtarit i ndalohet hyrja në të gjitha stadiumet, në aktivitetet sportive të organizuara nga FSHF, deri në përfundim të dënimit.
- KF Egnatia, për sjellje të gabuar të spektatorëve, hedhjen e sendeve në terrenin sportiv, duke shkaktuar dhunë ndaj zyrtarëve të ndeshjes dhe ndërprerjen e përkohshme të lojës, në bazë të neneve 65/1, 65/3/a, 65/3/c, dhe 65/4/b të KDS, dënohet me gjobë në masën 200.000 (dyqind mijë) lekë dhe zhvillimin e ndeshjeve të mbetura të aktiviteteve sportive të organizuara nga FSHF, pa spektatorë.
