Në një atmosferë të mrekullueshme dhe një organizimi pothuajse perfekt ka nisur zyrtarisht Kampionati Europian “Francë 2016”. Takimi Francë – Rumani është paraprirë nga David Guetta dhe Sia me këngën himn të Europianit, ndërsa nuk kanë munguar edhe avionët që kanë zbukuruar qiellin me flakadanët tringjyrësh.
Trajneri Dider Deschamps ka përgatitur skemën 4-3-3, por në të njëjtën mënyrë i përgjigjet dhe homologu i tij Iordanescu për sfidën hapëse të Europianit “Francë 2016”. Formacione sulmuese nga të dy trajnerët edhe pse në bazë të vlerave të skuadrave, Franca qëndron më lartë me kualitetet që ka.
https://www.youtube.com/watch?v=JembSW3fwXs
Francë – Rumani 2-1
Shënues: Oliver Giroud 58′, Payet 88′ / Stancu 66′
Formacionet
Franca: Lloris, Evra, Rami, Kanté, Griezmann (Coman 66′), Payet (Sisoko 90+2′), Giroud, Matuidi, Pogba (Martial 77′), Sagna, Koscielny.
Skema: 4-3-3
Trajner: Didier Deschamps
Rumania: Tătăruşanu, Raţ, Hoban, Chiricheş, Pintilii, Stanciu (Chipciu 72′), Andone (Alibec 61′), Stancu, Popa (Torje 82′), Grigore, Săpunaru.
Skema: 4-3-3
Trajner: Anghel Iordănescu
Gjyqtarë: V.Kassai, K.Ring, V.Toth (Hungari)
Kartonë të verdhë: Giroud 69′ / Chirches 32′, Rat 45′, Popa 78′
Stadiumi: “Stade de France” Paris
Pjesa e parë – Minutat e para të ndeshjes hapëse të Europianit flasin për Rumaninë. Në minutën e katërt janë të besuarit e Iordanescut që i afrohen rrjetës, ndërsa francezët me Matuidi mund të kishin shënuar autogol. Disa sekonda më pas ekzekutohet goditja e këndit nga rumunët, por që sfera përfundon pak mbi traun e portës së Lloris. “Gjelat” shfaqen rrezikshëm në disa raste, por pa mundur që të arrijnë të dalin në vijën e parë të sulmit. Ndërsa minuta e 14 mund të ishte vendimtare për minutat e zhvilluara të takimit, harkim i Sagna dhe Griezmann që gjuan me kokë, por sfera prek vetëm shtyllën e majtë të portës së Rumanisë. Me kalimin e minutave Franca bën zotërim të mirë të topit, ndërsa nuk kursehet me sulmet nga krahët, por që mungojnë finalizimet, pasi Rumania luan mirë në mbrojtje, duke mos lejuar depërtimin e ofensivës së “Gjelave”. Rasti i dytë i rrezikshëm në portën e rumunëve regjistrohet në minutën e 35, ku Payet merr krahun nga e djathta, sheh në zonë Griezmann, ndërsa ky i fundit në tentativë për ta dërguar drejt rrjetës e nxjerr jashtë. Dhe mbyllet pjesa e parë me rrjeta të paprekura.
Pjesa e dytë – Pesë minutat e para i takojnë Rumanisë, skuadër që e nis me agresivitet lojën dhe mundohet me çdo mënyrë që të dalë përpara. Por, mbrojtja e “gjelave” bën detyrën dhe rumunët e kanë të vështirë të kalojnë vijën e 16-metërshit. Në minutën e 52 francezët nisin të kontrollojnë lojën, ndër Giroud gjuan dhe topi kalon nën këmbët e një prej mbrojtësve rumunë dhe shkon drejt portës, por Tătăruşanu bën detyrën. Pak minuta më vonë Payet nga e majta e sulmit francez bën lëvizjet e duhura dhe jep një asist për Pogba, por ky i fundit gjuan dhe portieri e devijon në këndore. Në minutën e 58 vjen dhe aksioni final, i cili i jep dhe golin e avantazhit Francës me anë të Giroud, por që më parë arbitri Kassai duhet të kishte ndalur takimin për faull ndaj portierit të Rumanisë. Ndërkohë që festa e “gjelave” zgjat vetëm 6 minuta, pasi rumunët fitojnë 11-metërsh, i cili ekzekutohet mjeshtërisht nga Stancu, i cili barazon shifrat.
Franca shton presionin për të barazuar shifrat por e ka të vështirë, ndërsa trajneri Deschamps zgjedh të zëvendësojë dhe Pogba, por pa arritur të ndryshojë diçka konkrete në fushë. Por, edhe rumunët kundërpgjigjen mirë, teksa i afrohen edhe portës së vendësve, por pa kaluar dot në avantazh. Kur po mendohej se sfida do të mbyllej në barazim, Dimitri Payet shkarkon të djathtën e tij dhe e dërgon sferën në trekëndëshin e portës së rumunëve duke i dhënë golin e avantazhit Francës.
