Ky sezon në Europë është thjeshtë fantastik për 3 ekipet shqiptare. Partizani, Ballkani dhe Struga do të luajnë ditën e sotme sfidat e para në “Play-Off”, teksa synimet e tyre janë arritja në grupet e Conference League.
Partizani nga kampionati shqiptarë për herë të parë do të tentojë kualifikimin në grupet e një kompeticioni europian, ndërsa nga krahu tjetër kampionët e Kosovës synojnë arritjen për herë të dytë rresht në grupet e Conference League. Një sukses i jashtë zakonshëm për të besuarit e Ilir Dajës që rrjedhimisht kanë ngritur lart edhe koeficientin e Kosovës në garat europiane, teksa edhe sukseset e Dritës nuk duhen lënë mënjanë.
Për kampionatin shqiptar suksesi i Partizanit duket se nuk mjafton, pasi krahasuar tashmë me atë të skuadrave kosovare lë shumë për të dëshiruar. Kështu nga viti i ardhshëm skuadrat kosovare do ta nisin aventurën e tyre në europë nga turi i dytë i Europa League. Edhe fituesja e Kupës së Kosovës do të startojë nga ky tur, ndërsa vendi i dytë në kampionat e nis nga turi i dytë i Conference League.
Ndërkohë e kundërta ndodh me skuadrat e Superiores. Fituesja e Kupës dhe 2 skuadrat e tjera që sigurojnë pjesmarrjen në Europë, rrugëtimin e tyre do ta nisin nga turi i parë i Conference League. Ndërkohë kampionët e nisin nga turi i parë i Champions League.
