Kategoria Superiore nisi gjysmën e dytë të sezonit me javën e 19-të që prodhoi disa rezultate surprizë dhe ndeshje plot emocione me gola pafund. Surpriza e javës quhet Kukësi me verlindiroët që mposhtën Tiranën në shtëpi ndërsa spektakël golash dhuroi ndeshja Laçi 4–3 Teuta dhe Erzeni 3-2 Vllaznia.
Newsport.al ka zgjedhur më të mirët e javës së 19-të të elitës bashkë me trajnerin që meriton një vend në formacion. Nga porta në sulm, njihuni me futbollistët që shkëlqyen në Superiore duke dhënë kontributin e tyre me skuadrat që aktivizohen.
FORMACIONI I JAVËS:
Alen SHERRI – Gardiani i Egnatias dhuroi një tjetër paraqitje të nivelit të lartë. Shkodrani ishte një mur në katërkëndëshin e rrogozhinasve duke ndalur disa herë festën e Partizanit. Në pjesën e parë ndali një 11-metërsh të Tedi Carës dhe pas ndeshjes tregon karakterin e tij teksa nuk harron t’i japë merita “rivalit” Bruno Puja që e udhëzoi për penalltinë.
Altin BYTYÇI – Shtatlarti i Kukësit ishte në ditën e tij në fitoren ndaj Tiranës teksa ishte një protagonist absolut me golin e shënuar dhe duelet me sulmuesit bardheblu. Një nga “shtyllat” e Kukësit teksa në moshën 22-vjeçare luan sikur ka vite mbi supe. Hasi pak vështirësi në futjen e Kristal Abazajt por përballë Patrick dhe Gjumsit ishte i pakalueshëm.
Gëzim KRASNIQI – U rikthye nga dëmtimi dhe kapiteni i Erzenit tregon sesa i rëndëishëm është për shijakasit. Trajneri Kapllani nënvizon gjithmonë emrin e tij në intervistat pas ndeshjes. Dje ndaj Vllaznisë fitoi thuajse çdo duel me Bekim Balajn. Pavarësisht dy golave të pësuar, faji nuk ishte i tiji teksa një erdhi pas “reboundit” të topit në zonë ndërsa tjetri nga një goditje prej distancës. Lider.
Renato MALOTA – Njëjtë si Krasniqi, me të cilin ka qenë partner prej vitesh në mbrojtje, Malota është një faktor i rëndësishëm në suksesin e Egnatias. Mbrojtësi me eksperiencë ka rigjetur formën më të mirë teksa dje ndaj Partizani ishte solid përballë lojtarëve të kuq.
Ilirid ADEMI – Goleada në Niko Dovana nisi nga këmbët e tij. Anësori i Erzenit mori një top nga mesi i fushës dhe vrapoi si rraketë nga krahu i djathtë për të dërguar topin në këmbët e Smajlit që do e devijonte në portën e tij. I kudondodhur dhe nuk lodhet kurrë, është nga ata lojtarë që çdo trajner “dashuron” pasi kthehet pas sa herë ekipi ka nevojë.
Michael BABATUNDE – Eksperienca e tij dhe CV-ja e pasur ishte shkaku pse Laçi e afroi në verë. Mesfushori nigerian është një titullar absolut i kurbinasve që nga fillimi i sezonit. Një dëmtim e ndali për një kohë të shkurtër por tashmë është rikthyer sërish. Ndaj Teutës gjeti rrugën e rrjetës por dhuroi edhe dy asiste për shokët e skuadrës.
Serxho UJKA – Mesfusha është e Laçit këtë javë, si Babatunde ashtu edhe Ujka dominuan mesin e fushës në ndeshjen ndaj Teutës. Jo vetëm që shënoi por edhe kontrolloi cdo top në mesfushë. Është filtruesi i lojës së kurbinasve dhe ka besimin e plotë të cdo trajneri që vjen në krye të Laçit.
Eridon QARDAKU – Talenti shkodran i Bylisit është ndoshta lojtari më i mirë i ballshiotëve. Ndaj Kastriotit ishte një rrezik konstant, nuk gjeti rrugën e rrjetës por volumin e lojës që prodhon, pakkush e bën në Superiore. Gjen hapsira, driblon, kthehet në mbrojtje, shkurt vetëm goli i mungon.
ADELEKE Akinyemi – Luajti ndeshjen e fundit me Laçin dhe e mbylli në mënyrën më të mirë të mundshme. Realizoi një dygolësh që qetësoi kurbinasit dhe ishte një rrezik për mbrojtjen e Teutës. Erdhi si sulmues por luan kudo që t’i thotë trajneri, herë në krah, herë si sulmues i dytë, ai e bën detyrën e tij.
Raphael Dwamena – Një lojtar që rrethanat e veçanta e sollën në Superiore. Cilësitë e tij janë shumë të qarta, niveli është për një kampionat më të fortë. Nuk ka luajtur kot me Levanten në Spanjë. Që kur erdhi tek Egnatia është kthyer në pikë referimi në sulm. Ndaj Partizanit i dha 1 pikë rrogozhinasve me golin e shënuar.
Patrick NONATO – Me dygolëshin ndaj Vllaznisë merr kryesimin e renditjes së golashënuesve sëbashku me Florent Hasanin e Tiranës, pas largimit të Xhixhës dhe Skukës. Bomberi i Erzenit është arma kryesore e shijakasve. Kur niset me top vështirë se ndalet dhe ka një nuhatje të frikshme, duket sikur nuk jeton dot pa shënuar. Një bomber “rrace” nga ato që janë në “zhdukje” me futbollin modern.
Trajner: Rrahman HALLAÇI – Tekniku i Kukësit arriti të merrte një fitore surprizuese ndaj kampionëve dhe kryesuesve të kampionatit. I dha një frymëmarrje Kukësit teksa i ka marrë maksimumin djemve në dy ndeshjet e fundit. Afrimet e reja të merkatos duket se po funksionojnë dhe Hallaçi ka gjetur formulën për të marrë ato pikë aq të rëndësishme në garën për mbijetesë. Fitoi garën e pankinave me “Trajnerin e Vitit”, Orges Shehin.
