Derbi, Partizani - Tirana ishte ndeshja përmbyllëse e javës së 15-të të Superiores. Kjo sfidë përfundoi me rezultatin 1-0 në favor të të kuqve. Java ishte plot me emocione dhe si për t'i vënë kapakun, derbi i Elbasanit prodhoi spektakël në fushën e blertë.
Newsport.al ka përzgjedhur 11-shen më të mirë të kësaj jave. Nga porta e deri në sulm, ku edhe këtë javë Ardit Hoxhaj i Vllaznisë udhëheq më të mirët. Më poshtë njihuni me 11 më të mirët si dhe trajnerin fitues.
ALBAN HOXHA - "Gardiani" i kuq ishte vendimtar në fitoren e Partizanit në derbi. Shumë pritje nga portieri i Kombëtares që eviton çdo rrezik të paraqitur para tij. 33-vjeçari shkëlqeu përgjatë gjithë 90-minutave duke qenë një siguri më vete për 16 herë kampionët e Shqipërisë. Falë tij dhe sigurisht punës së madhe të shokëve të skuadrës, Partizani arriti një fitore të rëndësishme.
BLERIM KOTOBELLI - Ka mbi supe eksperiencën dhe si tillë këtë herë detyra e thërriti të luante në krahun e djathtë të mbrojtjes. Është lojtar i linjës së majtë dhe si i tillë ka qenë gjithmonë në fushë. Por, ndaj Apolonisë ai shkëlqeu në anën tjetër duke lënë përshtypje pozitive në stafin teknik.
MEVLAN ADILI - Javë pas jave ky njeri ka një vend në 11-shen më të mirë të Superiores. Po mrekullon çdo kënd mer performancën e tij dhe ndaj Bylisit ishte lojtari që dha asistin për Ardit Hoxhaj. Thuajse fitimtar në çdo duel, qendërmbrojtësi i Vllaznisë ka marrë rolin e liderit në skuadrën shkodrane.
MILOS STOJANOVIÇ - Bylis humbi një ndeshje që ndoshta barazimi duhet të kishte rezultati më i drejtë. Qendërmbrojtësi serb performoi jashtëzakonisht mirë duke u shndërruar në shtyllën e prapavijës mallakastriote. Edhe pse skuadra e tij doli me 0 pikë nga fusha, në aspektin individual shtatlarti shkëlqeu.
ALEKSANDRO KOUROS - Anësori i linjës së majtë të Teutës dha një kontribut të madh në fitoren 1-0 ndaj Kastriotit. Markim i mirë dhe sulm i frikshëm njëkohësisht. E blindoi anën e majtë të skuadrës së tij.
JORGO MEKSI - Realizon një gol të rëndësishëm për skuadrën e Skënderbeut dhe tregon eksperiencën e tij në kampionatin shqiptar. I pazëvendësueshëm në ekipin korçar ku ka marrë rolin e protagonistit për të qenë një shembull për të rinjtë e kësaj skuadre. Besim absolut i fituar nga trajneri Ahmataj.
VALENTINO MURATAJ - Çfarë futbollisti fantastik ka rrëmbyer Partizani. 50 mijë euro të paguara për kartonin e tij, në fushë zhvlerësohen thuajse totalisht nga ai. I palodhshëm për 90 minuta, thyen çdo aksion të kundërshtarit dhe organizon ekipin duke bërë urën lidhëse mes mbrojtjes dhe mesfushës. Padyshim më i miri në fushë në radhët e të kuqve. Luftoi deri në minutën e 95-të, atëherë kur fuqitë e të gjithëve thuajse kishin shteruar. Ndeshja e dytë me Partizanin, 90 minutëshi i dytë si titullar.
JASIR ASANI - Nëse është ai në fushë në një ndeshje derbi, e sigurt është që Partizani nuk humbën. Nuk është mposhtur asnjëherë nga Tirana kur ka qenë prezent. Dëmtimi i disa javëve më parë është lënë pas. Ka rigjetur formën më të mirë dhe në derbi shkëlqeu duke dhënë disa asist, por pa mundur të shfrytëzohen si duhen nga shokët e tij të skuadrës.
DEJVI BREGU - Një futbollist me mjaft klas që të kujton bukurinë e dikurshme të futbollit vlonjat. Goditjet nga distanca janë arma e tij më e fortë. "Qëndis" rastin e parë që i jepet duke i shënuar një Kastrioti që i ka hapur punë çdo skuadre. Një gol me vlerën e 3 pikëve që mban Teutën në lojë për titullin kampion.
ERALD ÇINARI - Kur ishte në nxehmje, ata që ishin prezentë në stadium i kërkon Ilir Dajës ta fuste në lojë që në fillim të pjesës së dytë. Mirëpo tekniku kryeqytetas mendon ndryshe dhe zgjedhja e tij rezulton efikase. Shkodrani, i shndërruar në makthin e Tiranës arrin të shënojë dhe të fitojë derbin me Partizanin e tij. Rikthehet në fushë pas 4 muajsh dënimi nga FIFA duke i treguar të gjithëve se tanimë kampionati shqiptar ka një vlerë të shtuar.
ARDIT HOXHAJ - 8 gola të shënuar në 15 ndeshje. Dhe ai s'e kishte menduar që do të kishte një ecuri të tillë në Vllazninë që ka bërë për vetë shumë sportdashës shqiptarë. Është sërish ai që vendos fatin e një transferte të vështirë si e Ballshit duke shënuar në minutën e 95-të.
TRAJNERI ILIR DAJA
Derbi u fitua, por pa diskutim meritën më të madhe e ka trajneri kryeqytetas. Së bashku me grintën e madhe të lojtarëve të tij u fitua një ndeshje që po shkonte drejt barazimit. E studioi lojën me kujdes dhe bëri zëvendësimet atëherë kur duheshin. I besoi Erald Çinarit që kishte 4 muaj pa shkelur në një ndeshje zyrtare dhe gjithçka u shpërblye më së miri nga ai. Derbi i parë i fituar në karrierën e tij. Padyshim që meriton të jetë trajneri i javës. /Newsport.al/
Lexo gjithashtu
