Sot është mbyllur java e 14-të e Superiores. 10 gola të shënuar në 5 ndeshje, ku spikat fitorja 1-0 e Vllaznisë në transfertë kundër Kukësit. Partizani arriti të triumfonte në Korçë në një terren të pushtuar nga dëbora, ndërsa surprizë ishte Apolonia që mposhti Laçin me rezultatin minimal 1-0.
Newsport.al ka përzgjedhur më të mirët e javës së kësaj jave, nga portieri e deri në repartin e sulmit. Një meritë të veçantë ka edhe trajneri i Apolonisë Kamarata që duket se ka ndryshuar me magji ekipin e tij, por për atë që prodhon në fushën e blertë Vllaznia dhe vazhdimësinë në rezultate, këtë javë fiton Thomas Brdariç.
FORMACIONI I JAVËS.
Visar Bekaj – Kastrioti kaloi i pari në avantazh dhe nëse nuk do të ishte “gardiani” i Tiranës, shifrat do të ishin thelluar duke e komplikuar seriozisht takimin për bardheblutë. Me të drejtë, portieri kosovar ishte goditja e duhur e kampionëve në merkaton e verës. Një siguri më vete për gjithë ekipin që premton dhe qetëson shumë për të ardhmen.
Marsen Ismailgeci – Talenti i skuadrës së Tiranës është ndër më të mirët në fushë për bardheblutë. Merr shumë herë krahun, mbron mirë në prapavijë dhe me “sallaksen” e tij dridh disa herë kundërshtarin. Nëse vijon me ritme të tilla, e ardhmja e tij padyshim do të jetë larg Shqipërisë dhe Superligës sonë.
Eljon Sota – Qendërmbrojtësi i Apolonisë bën spektakël ndaj Laçit. “U merr shpirtin” sulmuesve kurbinas duke fituar çdo duel me ta. Javë pas jave ka treguar progres në lojën e tij duke u shndërruar në lojtarin më të rëndësishëm të organikës fierake.
Mevlan Adili – Nëse ka një lojtar që këtë sezon po mrekullon me performancën e tij, padyshim ai është qendërmbrojtësi i Vllaznisë. Dje, ndaj Kukësit nuk gaboi në asnjë moment. Ndali çdo aksion të kundërshtarit si dhe mbante lart prapavijën ndaj sulmeve verilindore. Ka marrë rolin e liderit në mbrojtje duke merituar, pse jo, javë pas jave një vend në formacionin më të mirë.
Esat Mala – Sot luan si mbrojtës i djathtë. Në një pozicion që ishim mësuar ta shihnim disa herë me trajnerin Skënder Gega, Mala sot bën mjaft mirë. Elementët pozitivë të teknikës së tij ishin në plan të dytë, pasi në një terren të mbuluar nga dëbora, ai vrapoi pa pushim duke dalë fitues thuajse në çdo luftim me Skënderbeun.
Idriz Batha – Motorri i mesfushës së Tiranës që nuk pushon asnjë sekondë. Lëviz pa pushim gjatë gjithë 90 minutave dhe arrin të shënojë atëhere kur ekipi ka më shumë nevojë se kurrë. Ndaj Kastriotit tregon cilësinë dhe grintën e tij, duke u shndërruar në pikë referimi tek të rinjtë që përbëjnë organikën bardheblu.
Ardit Krymi – E tha edhe vetë pas fitores me Kukësin, por ky duhet të jetë sezoni më i mirë i karrierës së tij. Ndihmon maksimalisht Vllazninë në repartin e mesfushës, punon shumë duke i hapur shumë punë kundërshtarit. Një shkodran që ka rigjetur veten e tij me ardhjen e trajnerit Thomas Brdariç.
Jasir Asani – Dy gola nga Partizani, dy asiste pikërisht nga mëngjërashi shqiptar nga Maqedonia e Veriut. Lufton dhe fiton shumë duele në fazën ofensive, si dhe vepron mirë në mbrojtje. Në një terren të vështirë siç ishte stadiumi i Skënderbeut të Korçës, 25-vjeçari arriti t’i jepte një dorë të rëndësishme skuadrës për marrjen e 3 pikëve.
Lorenco Vila – Mesfushori i durrsakëve merr skuadrën për dore atëherë kur trajneri Edi Martini ka nevojë. Jo vetëm që është në flirt të vazhdueshëm me golin, por në çdo sfidë lë gjurmë me inkursionet e tij në gjysmëfushën kundërshtare. Teuta mori 3 pikë të rëndësishme me një Lorenco Vila që s’u ndal thuajse gjatë gjithë ndeshjes.
Arlind Kalaja – I besuan dhe ua shpërbleu. Pas shumë muajve mungesë në fushë për shkak dëmtimi dje bëri atë që çdo shkodran e kishte ëndërruar. Nxorri jashtë loje Kukësin për titullin kampion dhe realizoi golin e vetëm që i dha fitoren Vllaznisë.
Ernest Muçi – Është konstant në lojën e tij. Jo vetëm që shënon, por di të luajë bukur për t’i dhënë tjetër ngjyrim golave të tij. Ndaj Kastriotit ishte i papërmbajtshëm, realizoi dhe bëri thuajse çdo gjë në përfeksion. Me të drejtë flitet me superlativa për cilësitë e këtij djaloshi 19-vjeçar që ka marrë përsipër një peshë të rëndë, por deri më tani i ka mrekulluar të gjithë.
Trajner: THOMAS BRDARIÇ
Ngjyrat e Vllaznisë së tij janë si Barcelona, por në fakt këtë ekip këtë sezon e ka shndërruar në një ekip mini-katalanas. Pasime të shpejta dhe të sakta, topa tokazi dhe zbatim detyrash deri në detaje. Çfarë skuadre ka arritur të krijojë. Mposht një kundërshtar direkt si Kukësi duke e nxjerrë përfundimisht jashtë lojës për titull. Vllaznia e tij i kënaq të gjithë sportdashësit me performancën në fushë. Erdhi si i panjohur në botën e trajnigut, por deri tani ka dhënë leksione për të gjithë skeptikët. /Newsport.al/
Loading ...
