Vllaznia tani mund të nisë punën për sezonin e ri. Shkodranët kanë prezantuar në ambjentet e klubit drejtorin e ri sportiv Engin Firat.
Turko-gjermani ka thënë fjalët e para në konferencën për shtyp duke treguar dhe pikat nga do të nisë ringritja e skuadrës. Ai veçoi se kryebashkiakja e Shkodrës Voltana Ademi e bindi të pranonte ofertën e Bashkisë së Shkodrës si njeriu që do të menaxhojë procesin e riorganizimit të plotë të ekipit.
"Ka një situatë negative për shkak se ekipi është në Kategorinë e Parë, duhet ta ndryshojmë këtë situatë. Të gjithë duhet të punojmë bashkërisht, edhe media ka një rol të rëndësishëm për të krijuar një atmosferë pozitive. Kam folur me administratorin çfarë duhet të bëjmë dhe plani afatshkurtër është të kthehemi në elitë, pastaj kemi planin afatgjatë. Përmes këtij plani duam të shfrytëzojmë kapacitete e zonës, që ka lojtarë të talentuar. Kisha menduar se do ishte e lehtë, por tani e di që do të jetë e vështirë. Së pari duhet të përqendrohemi tek ekipi i parë, pasi duam të ngjitemi. Prandaj do vazhdojmë rikonstruktimin e klubi, duke nisur nga marketingu e deri tek akademia. Duam ta vendosim klubin në standardet më të larta. Telefonata me kryebashkiaken, më impresionoi. Më e rëndësishmja ishte të gjenim një vijë të mesme për të ecur së bashku. Doja të isha fleksibël dhe kemi arritur një marrëveshje. E falënderoj edhe Suad Licin që zgjidhi shumë problematika. Jemi gati të punojmë fort së bashku".
Prej një kohe të gjatë Firat ka qenë trajner te shumë klube të huaja turke, gjermane etj.
Lexo gjithashtu
