Që pasioni për futbollin në Shqipëri është i lartë dhe që ky sport ushtrohet nga një pjesë e madhe e fëmijëve dhe të rinjve në vendin tonë, nuk ka diskutim.
Problemi, ose më saktë një nga problemet kryesore është mungesa e terreneve sportive, madje edhe në kryeqytet, pikërisht në Tiranë ku është përqendruar ose projektojnë të ndërtojnë të ardhmen shumë të rinj që kërkojnë të merren me futboll.
Një dëshmi e këtij konstatimi janë edhe fotot e shkrepura dje në mbrëmje nga redaksia e newsport.al në një nga ambientet sportive më të mbipopulluara në kryeqytet, pikërisht në ish-kompleksin "Dinamo".
Si një ndër vendet e rralla ku ofrohet mundësia për të kryer stërvitje dhe ndeshje futbolli për ekipet e moshave, ky kompleks, tashmë me vetëm një fushë në gjendje funksionale është kthyer në epiqendrën e disa skuadra të rinjsh, private ose të varura nga klubet e futbollit.
Intensitet i lartë i seancave stërvitore nga shumë ekipe moshash, bën që disa ekipe të kryejnë aktivitetin e tyre në orët e mbrëmjes, gjithnjë duke e ndarë fushën në 4 pjesë, ku secili trajner ka mundësinë për të stërvitur lojtarët e tij në çerekun e tapetit jeshil (nëse mund të quhet jeshile ngjyra e zbehur e fushës me bar artificial dhe me pak material të gomuar që i ka mbetur).
Fotot nga kjo problematikë që ngrihet shpesh, këtë herë edhe nga redaksia newsport.al janë shkrepur mbrëmjen e djeshme në orën 20:20, gjatë seancave stërvitore të disa ekipe moshash private.
Siç mund të dallohet (edhe pse nga errësira nuk shihet qartë gjithçka) terreni në të cilin përgatitet, le të themi pse jo edhe një pjesë e së ardhmes së futbollit në vendin tonë, është krejt i papërshtatshëm. Shumë errësirë, pasi kullat e ndriçimit të vendosur në ish-kompleksin "Dinamo" më shumë ngjajnë me elektrik dore të varur në cepat e fushës sesa me impiant të posaçëm për të krijuar një ambient të përshtatshëm për të ushtruar aktivitet sportiv.
Pak hapësirë për shkak të dyndjes së disa ekipeve që stërviten njëkohësisht, lojtarë që zhvishen në fushë, ose largohen ashtu të djersitur për në shtëpi dhe për fat të keq edhe kanale të ujërave të zeza, pellgje të cilat nuk janë tharë ende nga rrebeshi i shiut që përfshiu edhe kryeqytetin disa ditë më parë. Kjo ka është panorama e një mbrëmjeje në ish-kompleksin "Dinamo".
Pa diskutim kushte të vështira për të marrë një produkt cilësor në të ardhmen edhe pse dëshira e lojtarëve të rinj dhe trajnerë që kërkojnë të ushtrojnë profesionin e tyre nuk mungon.
E thënë me pak humor, por pa e anashkaluar faktin se ky shqetësim duhet të ndërgjegjësojë organet kompetente, errësira në të cilën stërviten futbollistët e vegjël, në të ardhmen mund t'iu shërbejë për t'u bërë pse jo sulmues që do ta gjejnë portën me symbyllur.
Lexo gjithashtu
