Stadiumi "Elbasan Arena" është mbyllur përkohësisht në prag të ndeshjes mes Shqipërisë dhe Izraelit më 7 shtator, në kuadër të Ligës së Kombeve (Nations League).
Njoftimi zyrtar i FSHF-së, që solli dhe për pasojë zhvendosjen e ndeshjes së javës së tretë të Superiores mes Kukësit dhe Tiranës drejt "Loro Boriçit" në Shkodër, ishte ruajtja e fushës së blertë në kushte optimale për sfidën e Kombëtares. Por në fakt arsyeja është krejt tjetër.
Mësohet se kyçja e impiantit të Elbasanit është bërë me kërkesë të palës izraelite, e më konkretisht të shërbimit sekret Mossad që ka kërkuar marrjen nën kontroll bashkë me forcat e sigurisë së Shqipërisë të stadiumit për arsye sigurie. Në mënyrë të ngjashme me ndeshjen e para dy viteve, "Elbasan Arena" pritet të jetë sërish një "burg i sigurisë së lartë" për tifozët në këtë takim.
Kujtojmë se në sfidën e fundit kundër Izraelit pati sinjalizime që më pas rezultuan të vërteta për sulme terroriste gjatë sfidës, gjë që solli dhe zhvendosjen e takimit nga Shkodra drejt Elbasanit.
Lexo gjithashtu
