U afrua në kampionatin shqiptar në këtë merkato dimri. Laçi, skuadra që ka qenë gjithmonë një rival i fortë në Superiore për çdo skuadër arriti ta merrte në organikën e tij. Emanuel Mensah është ganezi që u bë i njohur pikërisht në sfidën ndaj Tiranës. Ai gol i shënuar kundër bardhebluve dhe paraqitjet e tij në vijim, e bëjnë atë një lojtar me cilësi të mira. Është vetëm 22-vjeç dhe e ardhmja e tij duket e ndritur. Në një intervistë eksluzive për newsport.al, Mensah ka treguar se si ndihet në Laç, cilën skuadër sheh si rivale të fortë dhe ç'mendon për objektivin e skuadrës kurbinase, qëndrimin në Superiore.
- Si po shkon aventura juaj me Laçin? Si ndiheni në skuadrën tuaj?
Deri më tani jam shumë i kënaqur te Laçi. Jam ambientuar me skuadrën dhe besoj se e tillë dhe do jetë dhe vazhdimësia me rezultate pozitive.
Ndihem mjaft mirë në skuadër. Të gjithë më duan, si në skuadër ashtu dhe tifozët. Ne kemi luajtur shumë mirë në të dy ndeshjet e fundit, megjithatë nuk arritëm të fitonim. Shpresoj dhe besoj që këtë do ta bëjmë në vijim pasi kemi në skuadër lojtarë mjaft kualitativë.
- A mendoni se do të mbijetoni në këtë sezon?
Po, jam i sigurtë që ne do të japim shumë në këtë sezon dhe do të qëndrojmë në Superligë.
- Cili është rivali juaj? Po skuadra më e fortë?
Në këtë moment me çdo skuadër që kemi luajtur ka qenë një rival për ne, pasi në çdo takim çdo pikë është shumë e rëndësishme për ne.
Unë mund t'iu them që Kukësi ka qenë rivali ynë më i madh në fushë deri më tani. Kjo ishte një ndeshje mjaft e rëndësishme për ne, të cilën kërkuam ta fitonim. Atmosfera në stadium ishte e jashtëzakonshme dhe kjo do të ishte një ditë e madhe nëse do të kishim fituar, por edhe barazimi nuk është një rezultat i keq.
- Keni surprizuar me paraqitjen tuaj në ndeshjen me Tiranën...
Unë jam i bindur te aftësitë e mia. Kur hy në fushë jam i vendosur për të luajtur mirë dhe kjo është një sfidë për veten time se si do ta përfundoj kampionatin shqiptar.
Me Tiranën ishte një ndeshje mjaft e mirë për ne. Atmosfera ishte e jashtëzakonshme në stadium dhe për këtë dua të falënderoj tifozët. Jam i lumtur që fituam ndeshjen, por gjithashtu edhe për golin që arrita të shënoja.
- Partizani, Skënderbeu apo Kukësi. Cila skuadër do të fitojë titullin?
Tani për tani nuk mund të them se cilat nga këto ekipe do ta fitojë titullin. Janë akoma edhe shumë ndeshje dhe gara është e hapur për të tre këto skuadra.
- A do të vijoni të jeni pjesë e kampionatit shqiptar dhe sezonin e ardhshëm?
Ka mundësi që edhe sezonin e ardhshëm të jem pjesë e Superligës në kampionatin shqiptar. Megjithatë këtë nuk e them me siguri. Tani për tani jam i përqëndruar me Laçin dhe dua të jap kontributin tim me këtë skuadër për të arritur objektivat që ka klubi.
- Së fundmi, cili ekip do të bjerë nga kategoria?
Mendoj që vetëm tre skuadrat e para nuk janë të rrezikuara së bashku me ekipin tim. Besoj shumë te potenciali që ka Laçi dhe sigurisht të gjithë jemi optimistë që do t'ia dalim. Në klub mbizotëron një atmosferë pozitive. / Retin TOKA/ NEWSPORT.AL/
Lexo gjithashtu
