Hektor Idrizaj është futur në "shportën" e dëshirave të drejtuesve të Partizanit për merkaton e janarit. Në fakt tashmë s'mund të konsiderohet më vetëm një dëshirë, por një tratativë e të kuqve për të "rrëmbyer" mbrojtësin e skuadrës së Kamzës.
Burime të besueshme bëjnë me dije për newsport.al që lojtari dhe drejtori i përgjithshëm i Partizanit, Olsi Rama kanë pasur një takim kokë më kokë në një nga lokalet e Ish-Bllokut. Pas ndeshjes së Kamzës kundër Skënderbeut (1-0), 29-vjeçari është parë në kryeqytet me drejtorin e kuq. Ende nuk dihen detaje të tjera apo të jetë arritur një akord mes palëve, por një takim i tillë, veçse miqësor, mund të thotë shumë edhe për të ardhmen e lojtarit.
Prej kohësh Partizani është vënë në kërkim të një lojtari të linjës së majtë, por deri më tani nuk kanë arritur të "qëllojnë në shenjë". Të detyruar, në një pozicion të tillë është improvizuar Lorenc Trashi ku ka arritur ta bëjë më së miri detyrën e tij. Duke qenë se gramshioti është tejet produktiv në fazën ofensive, drejtuesit e kanë parë të udhës të gjjenë një tjetër futbollist si mbrojtës të majtë dhe 26-vjeçari të zhvendoset përpara.
Falë eksperiencës dhe formës së treguar në këtë gjysmë të parë të sezonit, Hektor Idrizaj mund të vishet i kuq. Por, problem mbetet kontrata me Kamzën, e cila përfundon në fund të këtij edicioni futbollistik. Zhvillime të reja priten në vazhdim për sa i përket të ardhmes së tij. Kujtojmë që roli i tij natyral është mbrojtës i djathtë dhe kësisoj, trajneri Gega mund ta përdorë si një "xhol" sipas nevojave ndeshje pas ndeshje. Duke qenë se mbrojtësi është takuar me drejtorin e përgjithshëm të Partizanit, në këtë rast zë vend shprehja: "Ku ka zë, s'është pa gjë". /Newsport.al/
Lexo gjithashtu
